കൊച്ചി/തിരുവനന്തപുരം: കുംഭമേളയിലൂടെ സോഷ്യൽ മീഡിയയിൽ വൈറലായ മധ്യപ്രദേശ് സ്വദേശിനിയുടെ വിവാഹവുമായി ബന്ധപ്പെട്ട വിവാദങ്ങളിൽ അന്വേഷണം ഊർജിതമാക്കി മധ്യപ്രദേശ് പോലീസ്. വിവാഹ സമയത്ത് പെൺകുട്ടിക്ക് പ്രായപൂർത്തിയായിരുന്നില്ല എന്ന പരാതിയെത്തുടർന്ന് രജിസ്റ്റർ ചെയ്ത പോക്സോ (POCSO) കേസുമായി ബന്ധപ്പെട്ടാണ് മധ്യപ്രദേശ് പോലീസ് കേരളത്തിലെത്തിയത്.
പെൺകുട്ടിയും ഉത്തർപ്രദേശ് സ്വദേശിയായ യുവാവും തമ്മിലുള്ള വിവാഹം നടന്നത് കേരളത്തിൽ വെച്ചായതിനാലാണ് മധ്യപ്രദേശ് പോലീസ് കൊച്ചിയിലും തിരുവനന്തപുരത്തും എത്തിയത്. വിവാഹ സർട്ടിഫിക്കറ്റ്, ജനന സർട്ടിഫിക്കറ്റ് എന്നിവയുൾപ്പെടെയുള്ള നിർണ്ണായക രേഖകൾ കേരള പോലീസിൽ നിന്ന് ഇവർ ശേഖരിക്കും.
വിവാഹ സമയത്ത് പെൺകുട്ടി ഹാജരാക്കിയ ആധാർ കാർഡിൽ പ്രായപൂർത്തിയായതായി (18 വയസ്സ്) രേഖപ്പെടുത്തിയിരുന്നതായും ഇത് ഔദ്യോഗിക പോർട്ടൽ വഴി പരിശോധിച്ചതായും കേരള പോലീസ് വ്യക്തമാക്കുന്നു. എന്നാൽ, പെൺകുട്ടിക്ക് പ്രായപൂർത്തിയായിട്ടില്ലെന്നും വ്യാജ രേഖകളാണ് ഹാജരാക്കിയതെന്നും ആരോപിച്ചാണ് മധ്യപ്രദേശ് പോലീസ് അന്വേഷണം നടത്തുന്നത്.
ഈ വിവാഹം ‘യഥാർത്ഥ കേരള സ്റ്റോറി’ ആണെന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ നേരത്തെ പ്രതികരിച്ചിരുന്നു. എന്നാൽ, പ്രായപൂർത്തിയാകാത്ത പെൺകുട്ടിയുടെ വിവാഹത്തിന് ഒത്താശ ചെയ്തുവെന്ന് ആരോപിച്ച് വിവിധ സംഘടനകൾ രംഗത്തെത്തിയിട്ടുണ്ട്.കേരള പോലീസിൽ നിന്നുള്ള വിവരങ്ങളും വിവാഹം നടന്ന സ്ഥലത്തെ രേഖകളും പരിശോധിച്ച ശേഷം തുടർന്നുള്ള നടപടികളിലേക്ക് കടക്കാനാണ് മധ്യപ്രദേശ് പോലീസിന്റെ തീരുമാനം.
