ലണ്ടൻ: കുപ്രസിദ്ധ കുറ്റവാളി ജെഫ്രി എപ്സ്റ്റീനുമായുള്ള ബന്ധം മറച്ചുവെച്ച പീറ്റർ മൻഡേൽസണെ അമേരിക്കയിലെ ബ്രിട്ടീഷ് സ്ഥാനപതിയായി നിയമിച്ചതിൽ ഉണ്ടായ സുരക്ഷാ വീഴ്ച കെയർ സ്റ്റാർമർ സർക്കാരിനെ വലിയ പ്രതിസന്ധിയിലാക്കുന്നു. മൻഡേൽസന്റെ നിയമനവുമായി ബന്ധപ്പെട്ട് പാർലമെന്റിനെ തെറ്റിദ്ധരിപ്പിച്ചുവെന്നാരോപിച്ച് പ്രധാനമന്ത്രി സ്റ്റാർമറുടെ രാജി ആവശ്യപ്പെട്ട് പ്രതിപക്ഷം പ്രതിഷേധം ശക്തമാക്കി
ലൈംഗിക കുറ്റവാളിയായിരുന്ന ജെഫ്രി എപ്സ്റ്റീനുമായി പീറ്റർ മൻഡേൽസണ് അടുത്ത ബന്ധമുണ്ടായിരുന്നുവെന്ന വെളിപ്പെടുത്തലാണ് വിവാദത്തിന്റെ കേന്ദ്രം. എപ്സ്റ്റീൻ ശിക്ഷിക്കപ്പെട്ടതിന് ശേഷവും മൻഡേൽസൺ ഈ ബന്ധം തുടർന്നിരുന്നുവെന്നും ഗവൺമെന്റ് രേഖകൾ എപ്സ്റ്റീന് ചോർത്തി നൽകിയതായും ആരോപണമുണ്ട്.
പീറ്റർ മൻഡേൽസൺ സുരക്ഷാ പരിശോധനയിൽ (Security Vetting) പരാജയപ്പെട്ടുവെന്ന് സുരക്ഷാ ഏജൻസികൾ മുന്നറിയിപ്പ് നൽകിയിരുന്നെങ്കിലും, വിദേശകാര്യ മന്ത്രാലയം അത് മറികടന്നുകൊണ്ട് അദ്ദേഹത്തിന് നിയമനം നൽകുകയായിരുന്നു.
സുരക്ഷാ പ്രോട്ടോക്കോളുകൾ ലംഘിച്ച് എപ്സ്റ്റീനുമായി ബന്ധമുള്ള ഒരാളെ ഇത്രയും സുപ്രധാന പദവിയിൽ നിയമിച്ചത് ഗുരുതരമായ പിഴവാണെന്ന് പ്രതിപക്ഷം ചൂണ്ടിക്കാട്ടുന്നു. ഹോം സെക്രട്ടറി ഉൾപ്പെടെയുള്ളവർ രാജിവെക്കണമെന്നും പ്രധാനമന്ത്രി ഇതിന് മറുപടി പറയണമെന്നുമാണ് ആവശ്യം.കഴിഞ്ഞ സെപ്റ്റംബറിൽ മൻഡേൽസണെ സ്ഥാനപതി പദവിയിൽ നിന്ന് നീക്കം ചെയ്തിരുന്നുവെങ്കിലും, നിയമന പ്രക്രിയയിലെ അഴിമതിയും സുരക്ഷാ വീഴ്ചയും ഇപ്പോൾ ബ്രിട്ടീഷ് രാഷ്ട്രീയത്തിൽ വലിയ ചർച്ചയായി മാറിയിരിക്കുകയാണ്.
