വാഷിംഗ്ടൺ ഡി.സി.: ഇറാനുമായുള്ള വെടിനിർത്തൽ അനിശ്ചിതകാലത്തേക്ക് നീട്ടുന്നതായി അമേരിക്കൻ പ്രസിഡന്റ് ഡോണൾഡ് ട്രംപ് പ്രഖ്യാപിച്ചു. ഇരുരാജ്യങ്ങളും തമ്മിലുള്ള യുദ്ധം അവസാനിപ്പിക്കുന്നതിനുള്ള സമാധാന ചർച്ചകൾ തുടരുന്നതിനാണ് ഈ തീരുമാനമെന്ന് അദ്ദേഹം വ്യക്തമാക്കി. രണ്ടാഴ്ചത്തെ താൽക്കാലിക വെടിനിർത്തൽ കാലാവധി ഇന്ന് രാവിലെ അവസാനിക്കാനിരിക്കെയാണ് ട്രംപിന്റെ നിർണ്ണായക നീക്കം.
പാകിസ്ഥാന്റെ അഭ്യർത്ഥന മാനിച്ചാണ് വെടിനിർത്തൽ നീട്ടുന്നതെന്ന് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യലിൽ’ പങ്കുവെച്ച കുറിപ്പിൽ ട്രംപ് അറിയിച്ചു. പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്, ആർമി ചീഫ് ജനറൽ അസിം മുനീർ എന്നിവരുടെ ഇടപെടലിനെത്തുടർന്നാണ് ഇതെന്നും അദ്ദേഹം കൂട്ടിച്ചേർത്തു. ഇറാൻ അവരുടെ സമാധാന നിർദ്ദേശങ്ങൾ സമർപ്പിക്കുന്നത് വരെ ചർച്ചകൾക്ക് അവസരം നൽകാനാണ് ഈ തീരുമാനം.
അതേസമയം, ഇറാനിയൻ തുറമുഖങ്ങൾക്കും തീരങ്ങൾക്കും മേൽ യുഎസ് നേവി ഏർപ്പെടുത്തിയ ഉപരോധം (Blockade) തുടരുമെന്നും ട്രംപ് വ്യക്തമാക്കിയിട്ടുണ്ട്. ഇറാനിലേക്കും തിരിച്ചുമുള്ള കപ്പൽ ഗതാഗതം തടഞ്ഞുകൊണ്ടുള്ള ഈ നടപടി യുദ്ധപ്രഖ്യാപനമായാണ് ഇറാൻ കാണുന്നത്. ഇറാൻ ഒരു ഏകീകൃത സമാധാന നിർദ്ദേശം മുന്നോട്ടുവെക്കുന്നത് വരെ ഉപരോധം നീക്കില്ലെന്നും സൈന്യം ഏത് സാഹചര്യവും നേരിടാൻ സജ്ജമായിരിക്കുമെന്നും അദ്ദേഹം മുന്നറിയിപ്പ് നൽകി. നിലവിൽ ഇസ്ലാമാബാദിൽ നടക്കാനിരുന്ന രണ്ടാംഘട്ട ചർച്ചകൾക്കായി വൈസ് പ്രസിഡന്റ് ജെ.ഡി. വാൻസിന്റെ യാത്ര താൽക്കാലികമായി മാറ്റിവെച്ചിരിക്കുകയാണ്.
