മെൽബൺ: യുവാക്കളെ ലക്ഷ്യമിട്ട് വിപണിയിലെത്തുന്ന നികോട്ടിൻ പൗച്ചുകൾക്കെതിരെ കർശനമായ നിയന്ത്രണങ്ങൾ ഏർപ്പെടുത്തണമെന്ന് ഓസ്ട്രേലിയയിലെ ആരോഗ്യ വിദഗ്ധർ ആവശ്യപ്പെട്ടു. വാനിംഗ് സൃഷ്ടിച്ചതിന് സമാനമായ ആരോഗ്യപ്രശ്നങ്ങൾ ഇവയും ഉണ്ടാക്കുമെന്നാണ് ഓസ്ട്രേലിയൻ മെഡിക്കൽ അസോസിയേഷൻ മുന്നറിയിപ്പ് നൽകുന്നത്.
യുവാക്കളെ ആകർഷിക്കുന്ന ബ്രാൻഡിംഗിലൂടെയാണ് ഇവ വിപണി പിടിക്കുന്നത്. അംഗീകാരമില്ലാത്ത നികോട്ടിൻ ഉൽപ്പന്നങ്ങൾ ഓൺലൈൻ വഴി തടസ്സങ്ങളില്ലാതെ വിൽക്കുന്നത് തടയാൻ സർക്കാർ നടപടി സ്വീകരിക്കണമെന്ന് എഎംഎ വൈസ് പ്രസിഡന്റ് അസോസിയേറ്റ് പ്രൊഫസർ ജൂലിയൻ റൈറ്റ് ആവശ്യപ്പെട്ടു. നികോട്ടിൻ പൗച്ചുകൾ വായയിലും പല്ലിന്റെ മോണയിലും അസ്വസ്ഥതകളുണ്ടാക്കുമെന്നും കൂടാതെ അമിതമായ ദഹനപ്രശ്നങ്ങൾ, ഓക്കാനം, ഉയർന്ന രക്തസമ്മർദ്ദം എന്നിവയ്ക്കും കാരണമാകുമെന്നും അദ്ദേഹം ചൂണ്ടിക്കാട്ടി.
പഠനങ്ങൾ പ്രകാരം 30 മില്ലിഗ്രാം നികോട്ടിൻ അടങ്ങിയ ഒരു പൗച്ച് ഉപയോഗിക്കുന്നത് ഒരു സിഗരറ്റ് വലിക്കുന്നതിന് തുല്യമാണ്. എന്നാൽ വിപണിയിൽ 150 മില്ലിഗ്രാം വരെ നികോട്ടിൻ അടങ്ങിയ പൗച്ചുകൾ ലഭ്യമാണെന്നത് സാഹചര്യത്തിന്റെ ഗൗരവം വർദ്ധിപ്പിക്കുന്നു. നിലവിൽ ഓസ്ട്രേലിയൻ രജിസ്റ്റർ ഓഫ് തെറാപ്പിറ്റിക് ഗുഡ്സിൽ ഒരു നികോട്ടിൻ പൗച്ചും ഉൾപ്പെട്ടിട്ടില്ലാത്തതിനാൽ ഇവ സാധാരണ രീതിയിൽ വിതരണം ചെയ്യാൻ അനുമതിയില്ല. വ്യക്തിഗത ഇറക്കുമതി വഴിയോ മറ്റോ ഇത്തരം ഉൽപ്പന്നങ്ങൾ രാജ്യത്തെത്തുന്നത് തടയാൻ തെറാപ്പിറ്റിക് ഗുഡ്സ് അഡ്മിനിസ്ട്രേഷൻ നിർദ്ദേശിച്ച മാറ്റങ്ങളെ എഎംഎ സ്വാഗതം ചെയ്തു.
കുട്ടികൾക്ക് സിഗരറ്റ് വാങ്ങുന്നത് നിരോധിച്ചുകൊണ്ട് ബ്രിട്ടനിൽ പുതിയ നിയമങ്ങൾ നിലവിൽ വന്ന പശ്ചാത്തലത്തിലാണ് ഓസ്ട്രേലിയയിലും നിയന്ത്രണങ്ങൾ ശക്തമാക്കണമെന്ന ആവശ്യം ഉയരുന്നത്. നികോട്ടിൻ ഉൽപ്പന്നങ്ങളുടെ പാക്കേജിംഗിൽ കൃത്യമായ മുന്നറിയിപ്പുകൾ നൽകണമെന്നും ഓൺലൈൻ വിപണി നിരീക്ഷിക്കണമെന്നും എഎംഎ ആവശ്യപ്പെട്ടിട്ടുണ്ട്.
