ടെഹ്റാൻ/റിയാദ്: പശ്ചിമേഷ്യയിൽ കാലങ്ങളായി നിലനിൽക്കുന്ന നിഴൽ യുദ്ധത്തിന് അന്ത്യം കുറിച്ചുകൊണ്ട്, ചരിത്രത്തിലാദ്യമായി ഇറാനിൽ നേരിട്ട് വ്യോമാക്രമണം നടത്തി സൗദി അറേബ്യ. വർഷങ്ങളായി പ്രോക്സി ഗ്രൂപ്പുകൾ വഴി പോരാടിയിരുന്ന ഇരുരാജ്യങ്ങളും തമ്മിലുള്ള ഈ രഹസ്യ ‘പകരംവീട്ടൽ’ നടപടിയാണ് ഒടുവിൽ താത്കാലിക വെടിനിർത്തൽ കരാറിലേക്ക് കാര്യങ്ങളെ എത്തിച്ചതെന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. മാർച്ച് അവസാന വാരത്തിൽ നടന്ന ഈ അതീവ രഹസ്യ സൈനിക നീക്കത്തിന്റെ വിവരങ്ങൾ ഇപ്പോൾ മാത്രമാണ് പുറംലോകം അറിയുന്നത്.
മാർച്ച് അവസാന വാരത്തിൽ സൗദി വ്യോമസേന ഇറാന്റെ തന്ത്രപ്രധാനമായ സൈനിക കേന്ദ്രങ്ങൾ ലക്ഷ്യമിട്ട് ശക്തമായ ആക്രമണം നടത്തിയതായാണ് റോയിട്ടേഴ്സ് ഉൾപ്പെടെയുള്ള മാധ്യമങ്ങൾ സൂചിപ്പിക്കുന്നത്. സൗദിയിലെ എണ്ണക്കമ്പനികൾക്കും വിമാനത്താവളങ്ങൾക്കും നേരെ ഇറാൻ നടത്തിയ മിസൈൽ-ഡ്രോൺ ആക്രമണങ്ങൾക്കുള്ള തിരിച്ചടിയായിരുന്നു ഈ നീക്കം. സൗദി അറേബ്യ ഔദ്യോഗികമായി ഈ ആക്രമണം സ്ഥിരീകരിച്ചിട്ടില്ലെങ്കിലും, ഇറാൻ അധികൃതർക്ക് ഇത് സംബന്ധിച്ച ഔദ്യോഗിക സന്ദേശം നൽകിയിരുന്നതായും റിപ്പോർട്ടുകളുണ്ട്.
കൂടുതൽ ആക്രമണങ്ങൾ ഉണ്ടാകുമെന്ന കടുത്ത താക്കീത് സൗദി നൽകിയതോടെ മേഖലയിലെ സംഘർഷം പുതിയ തലത്തിലെത്തി. ഇതോടെയാണ് ഇരുരാജ്യങ്ങളും തമ്മിൽ രഹസ്യ നയതന്ത്ര ചർച്ചകൾ ആരംഭിച്ചത്. ഏപ്രിൽ ഏഴോടു കൂടി നിലവിൽ വന്ന പുതിയ ധാരണകൾ പ്രകാരം മേഖലയിൽ സംഘർഷം ലഘൂകരിക്കാനും വെടിനിർത്തൽ പാലിക്കാനും ഇരുപക്ഷവും സമ്മതിച്ചു എന്നാണ് റിപ്പോർട്ട്.
അമേരിക്കയുടെ പ്രതിരോധ കവചത്തിന് കാത്തുനിൽക്കാതെ സൗദി അറേബ്യ സ്വന്തം നിലയിൽ നടത്തിയ ഈ സൈനിക നീക്കം അന്താരാഷ്ട്ര തലത്തിൽ വലിയ ചർച്ചയായിട്ടുണ്ട്. യുഎഇയും സമാനമായ രീതിയിൽ ഇറാനിൽ രഹസ്യ ആക്രമണങ്ങൾ നടത്തിയതായി വാൾസ്ട്രീറ്റ് ജേണൽ റിപ്പോർട്ട് ചെയ്തിരുന്നു. ഗൾഫ് രാജ്യങ്ങൾ തങ്ങളുടെ സുരക്ഷാ കാര്യങ്ങളിൽ സ്വീകരിക്കുന്ന പുതിയതും ശക്തവുമായ നിലപാടുകളുടെ സൂചനയായാണ് നിരീക്ഷകർ ഇതിനെ കാണുന്നത്.
നിലവിൽ മേഖലയിൽ ആക്രമണങ്ങളുടെ എണ്ണത്തിൽ വലിയ കുറവ് രേഖപ്പെടുത്തിയിട്ടുണ്ട്. മാർച്ച് അവസാന വാരം സൗദിക്ക് നേരെ നൂറിലധികം ഡ്രോൺ ആക്രമണങ്ങൾ നടന്ന സ്ഥാനത്ത്, ഏപ്രിൽ ആദ്യ വാരത്തോടെ ഇത് ഇരുപത്തിയഞ്ചിൽ താഴെയായി ചുരുങ്ങിയത് ഈ പുതിയ നയതന്ത്ര-സൈനിക നീക്കങ്ങളുടെ ഫലമായാണ് വിലയിരുത്തപ്പെടുന്നത്.
