ബെംഗളൂരു: ഇന്ത്യയുടെ മുൻ നായകനും പ്രമുഖ ബാറ്ററുമായ വിരാട് കോഹ്ലിക്ക് ഹാംസ്ട്രിംഗ് പരിക്കേറ്റതിനെ തുടർന്ന് അഫ്ഗാനിസ്ഥാനെതിരായ ഏകദിന പരമ്പരയിൽ നിന്ന് ഒഴിവാക്കി. ജൂൺ 13 മുതൽ 20 വരെ നടക്കുന്ന മൂന്ന് മത്സരങ്ങളടങ്ങിയ ഏകദിന പരമ്പരയ്ക്ക് മുന്നോടിയായാണ് ഇന്ത്യയ്ക്ക് ഈ തിരിച്ചടി ലഭിച്ചിരിക്കുന്നത്.
ഐപിഎൽ 2026 ഫൈനലിനിടെയാണ് കോഹ്ലിക്ക് പരിക്കേറ്റതെന്നാണ് റിപ്പോർട്ടുകൾ. തുടർന്ന് നടത്തിയ സ്കാനിംഗിൽ ഹാംസ്ട്രിംഗ് ടെൻഡനിൽ പരിക്കുണ്ടെന്ന് കണ്ടെത്തി. ഇതേ തുടർന്ന് അദ്ദേഹത്തിന് വിശ്രമം നിർദേശിച്ചതായും ദേശീയ ടീമിൽ നിന്ന് താത്കാലികമായി മാറ്റിനിർത്തിയതായും റിപ്പോർട്ടുകൾ വ്യക്തമാക്കുന്നു. അഫ്ഗാനിസ്ഥാനെതിരായ പരമ്പര ജൂൺ 13ന് ആരംഭിക്കും.
കോഹ്ലിയുടെ അഭാവം ഇന്ത്യൻ ബാറ്റിംഗ് നിരയ്ക്ക് തിരിച്ചടിയാകുമെന്നാണ് വിലയിരുത്തൽ. പകരക്കാരനെക്കുറിച്ചുള്ള അന്തിമ തീരുമാനം സെലക്ടർമാർ ഉടൻ പ്രഖ്യാപിക്കുമെന്നാണ് സൂചന. സമീപകാലത്ത് മികച്ച ഫോമിലായിരുന്ന കോഹ്ലി, ഐപിഎൽ സീസണിലും ശ്രദ്ധേയ പ്രകടനം കാഴ്ചവെച്ചിരുന്നു. അതിനിടെയാണ് പരിക്ക് വില്ലനായത്.
