സിഡ്നി: സിഡ്നിയിൽ അടിയന്തര സേവനത്തിനായി പോകുന്നതിനിടെയുണ്ടായ വാഹനാപകടത്തിൽ വീരമൃത്യു വരിച്ച ന്യൂ സൗത്ത് വെയ്ൽസ് പോലീസ് ഉദ്യോഗസ്ഥയെ കോൺസ്റ്റബിൾ മിയ ലേ (20) എന്ന് തിരിച്ചറിഞ്ഞു. റെഡ്ഫെണിൽ ഔദ്യോഗിക പോലീസ് വാഹനം മരത്തിലിടിച്ചുണ്ടായ അപകടത്തിലാണ് ഇരുപതുകാരിയായ മിയ ലേ ദാരുണമായി കൊല്ലപ്പെട്ടത്.
ഗ്ലീബിൽ കാർ മോഷണം നടന്നതായുള്ള അടിയന്തര സന്ദേശം ലഭിച്ചതിനെ തുടർന്ന് സൈറൺ മുഴക്കി കുതിച്ചെത്തിയ പോലീസ് വാഹനത്തിലായിരുന്നു മിയ ഉണ്ടായിരുന്നത്. വാഹനത്തിന്റെ പാസഞ്ചർ സീറ്റിലിരുന്ന മിയ, റെഡ്ഫെണിൽ വെച്ച് നിയന്ത്രണം വിട്ട വാഹനം മരത്തിലേക്ക് ഇടിച്ചുകയറിയാണ് അപകടത്തിൽപ്പെട്ടത്.
ന്യൂ സൗത്ത് വെയ്ൽസ് പോലീസിൽ ചേർന്ന് വെറും 16 മാസങ്ങൾ മാത്രമായ മിയ ലേ, ചുരുങ്ങിയ കാലം കൊണ്ടുതന്നെ മികച്ച സേവന മികവ് തെളിയിച്ച ഉദ്യോഗസ്ഥയായിരുന്നു. സേനയോടും ജോലിയോടും അങ്ങേയറ്റം ആത്മാർത്ഥത പുലർത്തിയിരുന്ന മിയയെ ‘മാലാഖ’ എന്നാണ് സഹപ്രവർത്തകർ അനുസ്മരിച്ചത്.
അപകടത്തെക്കുറിച്ച് സമഗ്രമായ ക്രൈം ഇൻസിഡന്റ് ഇൻവെസ്റ്റിഗേഷൻ (Critical Incident Investigation) ആരംഭിച്ചിട്ടുണ്ട്. ചെറുപ്രായത്തിൽ തന്നെ നാടിന്റെ സുരക്ഷയ്ക്കായി ഡ്യൂട്ടി നിർവഹിക്കുന്നതിനിടെ ജീവൻ ത്യജിക്കേണ്ടി വന്ന മിയ ലേയുടെ വിയോഗത്തിൽ എൻ.എസ്.ഡബ്ല്യു പോലീസും സഹപ്രവർത്തകരും കുടുംബാംഗങ്ങളും അഗാധമായ ദുഃഖം രേഖപ്പെടുത്തി.
