സിഡ്നി: മക്ഡൊണാൾഡ്സ് ഔട്ട്ലെറ്റുകളിൽ ഭക്ഷണം കഴിക്കാനെത്തുന്ന ഉപഭോക്താക്കൾക്ക് അപ്രതീക്ഷിതമായി ഭീമമായ പാർക്കിംഗ് ഫീസും പിഴയും ഈടാക്കുന്നതായി പരാതി. ചുരുങ്ങിയ സമയം കൊണ്ട് ഭക്ഷണം കഴിച്ച് മടങ്ങാൻ എത്തുന്നവരെപ്പോലും ഞെട്ടിക്കുന്ന തരത്തിലാണ് പുതിയ പാർക്കിംഗ് നിയന്ത്രണങ്ങൾ നടപ്പിലാക്കുന്നത്.
സിഡ്നിയിലെ വാട്ടർലൂവിലുള്ള മക്ഡൊണാൾഡ്സ് ശാഖയിൽ എത്തുന്ന ഉപഭോക്താക്കൾക്ക് ഒരു മണിക്കൂർ മാത്രമാണ് സൗജന്യ പാർക്കിംഗ് അനുവദിക്കുന്നത്. ഈ സമയപരിധി കഴിഞ്ഞാൽ ഒരു ദിവസത്തെ ഫീസായി 35 ഡോളർ ഈടാക്കുന്നുണ്ട്. മറ്റൊരു സംഭവത്തിൽ, മക്കളോടൊപ്പം മക്ഡൊണാൾഡ്സിൽ എത്തി 55 മിനിറ്റോളം ചിലവഴിച്ച ഒരു ഉപഭോക്താവിന് 77 ഡോളറിന്റെ പിഴ നോട്ടീസ് ലഭിച്ചതായും പരാതി ഉയർന്നിട്ടുണ്ട്. വാഹനങ്ങളുടെ നമ്പർ പ്ലേറ്റ് തിരിച്ചറിയുന്ന ക്യാമറകൾ ഉപയോഗിച്ചാണ് പലയിടങ്ങളിലും വാഹനങ്ങൾ പാർക്കിംഗിൽ ചിലവഴിക്കുന്ന സമയം കൃത്യമായി ട്രാക്ക് ചെയ്യുന്നത്.
ഭക്ഷണം കഴിക്കാൻ എത്തുന്ന യഥാർത്ഥ ഉപഭോക്താക്കൾക്ക് പാർക്കിംഗ് സ്ഥലം ഉറപ്പാക്കാനും, മറ്റ് യാത്രക്കാരും പ്രദേശവാസികളും അനാവശ്യമായി പാർക്കിംഗ് ഉപയോഗിക്കുന്നത് തടയാനുമാണ് തേർഡ് പാർട്ടി ഓപ്പറേറ്റർമാരെ പാർക്കിംഗ് നിയന്ത്രണം ഏൽപ്പിച്ചിരിക്കുന്നതെന്നാണ് മക്ഡൊണാൾഡ്സിന്റെ വിശദീകരണം.
എന്നാൽ, പണം നൽകി ഭക്ഷണം കഴിക്കുന്ന ഉപഭോക്താക്കൾക്ക്, പ്രത്യേകിച്ച് കുട്ടികളുമായി എത്തുന്ന കുടുംബങ്ങൾക്ക്, ഓർഡർ നൽകി ഭക്ഷണം കഴിച്ച് മടങ്ങാൻ വെറും 30 മുതൽ 60 മിനിറ്റ് വരെയുള്ള സമയം ഒട്ടും പര്യാപ്തമല്ലെന്ന് ഉപഭോക്താക്കൾ ചൂണ്ടിക്കാട്ടുന്നു. നിശ്ചിത സമയപരിധി കഴിഞ്ഞയുടൻ 35 ഡോളറും അതിലധികവും പിഴയായി ഈടാക്കുന്ന നടപടി തികച്ചും അന്യായമാണെന്നാണ് പൊതുജനാഭിപ്രായം.
