വാഷിങ്ടൺ: തന്ത്രപ്രധാനമായ ഹോർമുസ് കടലിടുക്കിൽ (Strait of Hormuz) യു.എസ് സേനയും ഇറാനും തമ്മിൽ ശക്തമായ ആകാശപോരാട്ടം. അന്താരാഷ്ട്ര കപ്പൽപ്പാതയിലൂടെയുള്ള ജലഗതാഗതത്തിന് അടിയന്തര ഭീഷണിയുയർത്തി ഇറാൻ വിക്ഷേപിച്ച നാല് ആക്രമണ ഡ്രോണുകൾ (One-way attack drones) അമേരിക്കൻ സൈന്യം വെടിവെച്ചിട്ടു. യു.എസ് സെൻട്രൽ കമാൻഡ് (CENTCOM) ആണ് ഇക്കാര്യം ഔദ്യോഗികമായി അറിയിച്ചത്.
വെള്ളിയാഴ്ചയാണ് ഹോർമുസ് കടലിടുക്കിന് നേരെ നീങ്ങിയ ഇറാന്റെ ഡ്രോണുകൾ യു.എസ് സൈന്യം തകർത്തത്. ഇതിന് തിരിച്ചടിയായി ഇറാന്റെ തീരദേശ നിരീക്ഷണ റഡാർ കേന്ദ്രങ്ങൾക്ക് നേരെയും യു.എസ് സൈന്യം ശക്തമായ ആക്രമണം നടത്തി. ഇറാന്റെ ഭാഗത്തുനിന്നുള്ള കൂടുതൽ ആക്രമണങ്ങളെ പ്രതിരോധിക്കുന്നതിനും സഖ്യകക്ഷികളുടെ സുരക്ഷ ഉറപ്പാക്കുന്നതിനുമാണ് ഈ നടപടിയെന്ന് യു.എസ് സൈനിക വക്താവ് വ്യക്തമാക്കി.
യു.എസിന്റെ ഈ വ്യോമാക്രമണത്തിന് തൊട്ടുപിന്നാലെ മേഖലയിലെ യു.എസ് സൈനിക താവളങ്ങൾക്ക് നേരെ ഇറാൻ ബാലിസ്റ്റിക് മിസൈലുകൾ വിക്ഷേപിച്ചതായും റിപ്പോർട്ടുകളുണ്ട്. കുവൈത്തിലെ അലി അൽ സലേം എയർബേസിനും ബഹ്റൈനിലെ യു.എസ് നേവിയുടെ അഞ്ചാം കപ്പൽപ്പടയുടെ താവളത്തിനും നേരെയാണ് ഇറാൻ റവല്യൂഷണറി ഗാർഡ് മിസൈലുകൾ തൊടുത്തത്. എന്നാൽ ഇവയിൽ ഭൂരിഭാഗവും യു.എസ്-കുവൈത്ത് പ്രതിരോധ സേനകൾ തകർത്തതായും യു.എസ് ഉദ്യോഗസ്ഥർക്ക് ആർക്കും പരിക്കേറ്റിട്ടില്ലെന്നും സെൻട്രൽ കമാൻഡ് അറിയിച്ചു.
ഇരുരാജ്യങ്ങളും തമ്മിൽ അടുത്തിടെ ഒപ്പുവെച്ച താൽക്കാലിക വെടിനിർത്തൽ കരാർ പൂർണ്ണമായും തകരുന്ന രീതിയിലേക്കാണ് നിലവിലെ സംഭവവികാസങ്ങൾ വിരൽ ചൂണ്ടുന്നത്. ഇറാന്റെ പ്രധാന തുറമുഖങ്ങൾക്ക് മേൽ യു.എസ് ഏർപ്പെടുത്തിയിരിക്കുന്ന ഉപരോധം കടുപ്പിക്കുന്നതിനിടയിലാണ് പുതിയ സംഘർഷങ്ങൾ ഉടലെടുത്തിരിക്കുന്നത്.
ആഗോള എണ്ണ-വാതക വിതരണത്തെ ബാധിക്കുന്ന തരത്തിൽ ഹോർമുസ് കടലിടുക്കിൽ നിലനിൽക്കുന്ന പ്രതിസന്ധി ആഗോള വിപണിയിൽ ഇന്ധനവില വർധിക്കാനും കാരണമായിട്ടുണ്ട്.
