ബ്രസൽസ്: ചൈനീസ് ഇ-കൊമേഴ്സ് പ്ലാറ്റ്ഫോമുകൾ വഴി യൂറോപ്യൻ യൂണിയനിലേക്ക് എത്തുന്ന കുറഞ്ഞ മൂല്യമുള്ള ഉൽപ്പന്നങ്ങൾക്ക് ഏർപ്പെടുത്തിയിരുന്ന കസ്റ്റംസ് ഡ്യൂട്ടി ഇളവ് റദ്ദാക്കി. ഇതോടെ, ഷീൻ (SHEIN), തെമു (Temu), അലി എക്സ്പ്രസ് (AliExpress) തുടങ്ങിയ പ്ലാറ്റ്ഫോമുകളിൽ നിന്നുള്ള ഇറക്കുമതിക്ക് ജൂലൈ ഒന്ന് മുതൽ ഫ്ലാറ്റ് 3 യൂറോ കസ്റ്റംസ് ഡ്യൂട്ടി ഈടാക്കി തുടങ്ങി.
നേരത്തെ 150 യൂറോയിൽ താഴെ മൂല്യമുള്ള പാഴ്സലുകൾക്ക് കസ്റ്റംസ് ഡ്യൂട്ടിയിൽ നിന്ന് ലഭിച്ചിരുന്ന ഇളവാണ് ഇതോടെ ഇല്ലാതായത്. വർഷംതോറും രണ്ടിലധികം ബില്യൺ ചെറിയ പാഴ്സലുകൾ യൂറോപ്യൻ യൂണിയനിലേക്ക് എത്തുന്നുണ്ടെന്നും, ഇതിൽ വലിയൊരു പങ്കും തെറ്റായ മൂല്യനിർണ്ണയമോ അവ്യക്തമായ സുരക്ഷാ വിവരങ്ങളോ ഉള്ളതാണെന്നും യൂറോപ്യൻ കമ്മീഷൻ ചൂണ്ടിക്കാട്ടി. ഒരു ബാസ്കറ്റിൽ ഒന്നിലധികം ഉൽപ്പന്നങ്ങൾ ഉണ്ടെങ്കിൽ ഓരോ ഉൽപ്പന്ന വിഭാഗത്തിനും 3 യൂറോ വീതം ഡ്യൂട്ടി നൽകേണ്ടി വരും.
കൂടാതെ, പുതിയ നിയമപ്രകാരം പ്ലാറ്റ്ഫോമുകൾ തന്നെ നിയമപരമായ ഇറക്കുമതിക്കാരായി മാറും. ഉൽപ്പന്നങ്ങളുടെ സുരക്ഷയുടെ പൂർണ്ണ ഉത്തരവാദിത്തം പ്ലാറ്റ്ഫോമുകൾക്കായിരിക്കും, നിലവാരം പാലിക്കാത്ത ഉൽപ്പന്നങ്ങൾക്ക് പിഴയും ഈടാക്കും. 2026-ൽ 2 യൂറോയുടെ ഹാൻഡ്ലിംഗ് ഫീ ഏർപ്പെടുത്താനും 2028-ഓടെ 150 യൂറോയുടെ ഇളവ് പൂർണ്ണമായും നീക്കം ചെയ്യാനും പദ്ധതിയുണ്ട്. ചൈനയിൽ നിന്ന് നേരിട്ട് ഉൽപ്പന്നങ്ങൾ അയക്കുന്ന പ്ലാറ്റ്ഫോമുകൾക്ക് യൂറോപ്പിലെ വ്യാപാരികളേക്കാൾ അനർഹമായ മുൻതൂക്കം ലഭിക്കുന്നുവെന്ന പരാതിയെ തുടർന്നാണ് ഈ കർശന നടപടി.
