ന്യൂഡൽഹി: ദേശീയ ഗീതമായ വന്ദേമാതരത്തിന്റെ ആറ് ചരണങ്ങളും ആലപിക്കുന്നത് നിർബന്ധമാക്കിയ കേന്ദ്ര സർക്കാർ ഉത്തരവിനെതിരെയും അതിലെ ശിക്ഷാ നടപടിക ൾക്കെതിരെയും സമർപ്പിക്കപ്പെട്ട ഹർജിയിൽ സുപ്രീം കോടതി കേന്ദ്ര സർക്കാരിന്റെ നിലപാട് തേടി. പ്രശസ്ത കർണാടക സംഗീതജ്ഞൻ ടി.എം. കൃഷ്ണ സമർപ്പിച്ച ഹർജി പരിഗണിച്ച ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് രണ്ടാഴ്ചയ്ക്കകം വിശദീകരണം നൽകാൻ കേന്ദ്ര സർക്കാരിനോട് ആവശ്യപ്പെട്ടത്.
ദേശീയ ഗീതത്തെ ആദരിക്കേണ്ടത് ഏവരുടെയും കടമയാണെങ്കിലും, ആറ് ചരണങ്ങളും പാടാത്തതിന്റെ പേരിൽ ഒരാൾക്കെതിരെ ക്രിമിനൽ കേസ് എടുക്കുന്നതും ശിക്ഷാ നടപടികൾ സ്വീകരിക്കുന്നതും ഭരണഘടനാപരമായ അവകാശങ്ങളുടെ ലംഘനമാണോ എന്ന് പരിശോധിക്കേണ്ടതുണ്ടെന്ന് കോടതി നിരീക്ഷിച്ചു. മുൻപ് ബിജോയ് ഇമ്മാനുവൽ കേസിൽ വ്യക്തിപരമായോ മതപരമായോ ഉള്ള വിശ്വാസങ്ങൾ മൂലം ഗാനം ആലപിക്കാതിരിക്കുന്നത് കുറ്റകരമല്ലെന്ന് സുപ്രീം കോടതി വ്യക്തമാക്കിയ തത്വം ഈ വിഷയത്തിലും ബാധകമാണോ എന്ന് പരിശോധിക്കുമെന്ന് കോടതി ചൂണ്ടിക്കാട്ടി. അതേസമയം, ഏതൊക്കെ ചരണങ്ങളാണ് ദേശീയ ഗീതത്തിൽ ഉൾപ്പെടുത്തേണ്ടതെന്ന് തീരുമാനിക്കേണ്ടത് സർക്കാരാണെന്നും കോടതി അഭിപ്രായപ്പെട്ടു.
ആറ് ചരണങ്ങളുള്ള പൂർണ്ണ രൂപത്തിലെ അവസാന നാല് ചരണങ്ങളിൽ ഹൈന്ദവ ദേവതമാരുടെ പരാമർശങ്ങൾ ഉള്ളതിനാൽ, അത് എല്ലാവരുടെയും മേൽ നിർബന്ധപൂർവ്വം അടിച്ചേൽപ്പിക്കുന്നത് രാജ്യത്തിന്റെ മതേതര സ്വഭാവത്തിന് എതിരാണെന്നാണ് ഹർജിക്കാരന്റെ പ്രധാന വാദം. എന്നാൽ, ചരിത്രപരമായ പ്രാധാന്യമുള്ള ദേശീയ ഗീതത്തോട് രാജ്യത്തെ പൗരന്മാർ ബഹുമാനം കാണിക്കണമെന്നും വിഷയത്തിൽ അനാവശ്യ വിവാദങ്ങൾ ഉണ്ടാക്കരുതെന്നും കേന്ദ്ര സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത വാദിച്ചു. ഇരു വിഭാഗത്തിന്റെയും വാദങ്ങൾ കേട്ട കോടതി, കേന്ദ്ര സർക്കാരിന്റെ വിശദമായ മറുപടി ലഭിച്ച ശേഷം തുടർനടപടികളിലേക്ക് കടക്കുമെന്ന് വ്യക്തമാക്കി.
