മെൽബൺ: ട്രഷറർ ജിം ചാൽമേഴ്‌സിന്റെ നികുതി അജണ്ടയ്‌ക്കെതിരെ രൂക്ഷവിമർശനവുമായി വൺ നേഷൻ പാർട്ടി നേതാവ് പോളിൻ ഹാൻസൻ. അധികാരത്തിലെത്തിയാൽ ആൽബനീസ് സർക്കാരിന്റെ വിവാദമായ നെഗറ്റീവ് ഗിയറിംഗ് നിയന്ത്രണങ്ങളും മൂലധന നേട്ട നികുതിയിലെ മാറ്റങ്ങളും റദ്ദാക്കുമെന്ന് അവർ പ്രഖ്യാപിച്ചു. സർക്കാർ ഓസ്‌ട്രേലിയൻ കുടുംബങ്ങളുടെ സമ്പാദ്യത്തെയും ഭവന സ്വപ്നങ്ങളെയും അപകടത്തിലാക്കുകയാണെന്നും, ചാൽമേഴ്‌സ് രാജ്യത്തിന്റെ സമ്പദ്‌വ്യവസ്ഥയെ പരീക്ഷണശാലയാക്കി സാധാരണക്കാരെ ഗിനിപ്പന്നികളാക്കുകയാണെന്നും ഒക്ടോബർ 19-ന് പുറത്തിറക്കിയ പ്രസ്താവനയിൽ ഹാൻസൻ ആരോപിച്ചു.
തങ്ങൾ അധികാരത്തിലെത്തിയാൽ 50 ശതമാനം മൂലധന നേട്ട നികുതി ഇളവ് പുനഃസ്ഥാപിക്കുമെന്നും, ഓരോ നിക്ഷേപകനും പരമാവധി രണ്ട് റെസിഡൻഷ്യൽ പ്രോപ്പർട്ടികൾക്ക് വരെ നെഗറ്റീവ് ഗിയറിംഗ് ആനുകൂല്യം അനുവദിക്കുമെന്നും ഹാൻസൻ വ്യക്തമാക്കി. കൂടാതെ, ഡിസ്‌ക്രിഷണറി ട്രസ്റ്റുകൾക്ക് ഏർപ്പെടുത്താൻ ഉദ്ദേശിക്കുന്ന 30 ശതമാനം മിനിമം നികുതി പൂർണ്ണമായി ഒഴിവാക്കുമെന്നും അവർ പറഞ്ഞു. കഠിനാധ്വാനം ചെയ്ത് നിക്ഷേപങ്ങൾ നടത്തി മുന്നേറാൻ ഓസ്‌ട്രേലിയക്കാർക്ക് അവകാശമുണ്ടെന്നും, എന്നാൽ വൻകിട റിയൽ എസ്റ്റേറ്റ് മുതലാളിമാർക്ക് പരിധിയില്ലാത്ത നികുതിയിളവ് നൽകുന്ന രീതി ശരിയല്ലെന്ന നിലപാടാണ് വൺ നേഷന്റേതെന്നും അവർ കൂട്ടിച്ചേർത്തു.
മെയ് ബജറ്റിലാണ് ആൽബനീസ് സർക്കാർ പ്രോപ്പർട്ടി-നിക്ഷേപ നികുതികളിൽ ദൂരവ്യാപകമായ അഴിച്ചുപണി പ്രഖ്യാപിച്ചത്. 2027 ജൂലൈ 1 മുതൽ വാങ്ങുന്ന റെസിഡൻഷ്യൽ പ്രോപ്പർട്ടികളിൽ പുതിയതായി നിർമ്മിച്ച വീടുകൾക്ക് മാത്രമായി നെഗറ്റീവ് ഗിയറിംഗ് ആനുകൂല്യം പരിമിതപ്പെടുത്തിയിരുന്നു. എന്നാൽ 2026 മെയ് 12-ന് മുൻപ് വാങ്ങിയ നിലവിലെ നിക്ഷേപങ്ങളെ ഇതിൽ നിന്ന് ഒഴിവാക്കിയിരുന്നു. ഇതിനുപുറമെ, ദീർഘകാലമായി നിലനിന്നിരുന്ന 50 ശതമാനം സിജിടി കിഴിവിന് പകരം പണപ്പെരുപ്പ സൂചികയെ അടിസ്ഥാനമാക്കിയുള്ള ഇളവും യഥാർത്ഥ മൂലധന നേട്ടത്തിന് 30 ശതമാനം മിനിമം നികുതിയും ഏർപ്പെടുത്താനാണ് ലേബർ സർക്കാരിന്റെ തീരുമാനം.
നിക്ഷേപകരെ പുതിയ ഭവന നിർമ്മാണത്തിലേക്ക് തിരിച്ചുവിടാനും ആദ്യമായി വീട് വാങ്ങുന്നവർക്ക് കൂടുതൽ അവസരം നൽകാനും ഈ പരിഷ്കാരങ്ങൾ സഹായിക്കുമെന്നാണ് സർക്കാർ വാദം. അടുത്ത പത്ത് വർഷത്തിനുള്ളിൽ 75,000 പേർക്ക് അധികമായി വീട് സ്വന്തമാക്കാൻ ഇതിലൂടെ കഴിയുമെന്നും ട്രഷറർ വ്യക്തമാക്കിയിരുന്നു. എന്നാൽ ഈ വാദങ്ങൾ തള്ളിക്കളഞ്ഞ ഹാൻസൻ, സാധാരണ നിക്ഷേപകർക്ക് പരമാവധി രണ്ട് വീടുകൾക്ക് നെഗറ്റീവ് ഗിയറിംഗ് അനുവദിക്കുന്ന മധ്യവർത്തി നിലപാടാണ് തങ്ങളുടേതെന്ന് വ്യക്തമാക്കുകയായിരുന്നു.
