ചെന്നൈ: പ്രമുഖ തമിഴ് നടൻ ശിവാജി ഗണേശന്റെയും കമലാ ഗണേശന്റെയും മൂത്ത മകൾ ശാന്തി നാരായണസാമി അന്തരിച്ചു. ഞായറാഴ്ച ചെന്നൈയിൽവച്ചായിരുന്നു അന്ത്യം. കുറച്ചുദിവസങ്ങളായി ആരോഗ്യപ്രശ്നങ്ങൾ നേരിട്ടിരുന്നതായും കുടുംബവൃത്തങ്ങളെ ഉദ്ധരിച്ച് റിപ്പോർട്ടുകൾ പറയുന്നു. അവർക്ക് 71 വയസായിരുന്നു.
ശിവാജി ഗണേശൻ–കമല ദമ്പതികളുടെ ആദ്യത്തെ മകളായിരുന്നു ശാന്തി. നിർമാതാവ് രാംകുമാർ, നടൻ പ്രഭു, തേന്മൊഴി എന്നിവരാണ് സഹോദരങ്ങൾ.
സിനിമാ മേഖലയുമായും ശാന്തിക്ക് അടുത്ത ബന്ധമുണ്ടായിരുന്നു. ശിവാജി ഗണേശൻ നിർമിച്ച 1974ലെ ‘തങ്കപ്പതക്കം’ ഉൾപ്പെടെ സിനിമകളുടെ നിർമാണവുമായി അവർ ബന്ധപ്പെട്ടിരുന്നു. ‘നീതിയിൻ നിഴൽ’ (1985), ‘വെട്രിവിഴാ’ (1989) തുടങ്ങിയ ചിത്രങ്ങളും അവർ നിർമിച്ചതായി റിപ്പോർട്ടുകളുണ്ട്.
ചെന്നൈയിലെ അണ്ണാ സാലയിലുണ്ടായിരുന്ന ശാന്തി തിയറ്ററിനും അവരുടെ പേരുമായി ബന്ധമുണ്ടായിരുന്നു. ശിവാജി ഗണേശനാണ് മകളുടെ പേരിൽ തിയറ്ററിന് പേര് നൽകിയത്. പിന്നീട് തിയറ്റർ പൊളിച്ച് കെട്ടിടസമുച്ചയം പുനർവികസിപ്പിച്ചു.
ശാന്തിയുടെ വിയോഗത്തിൽ തമിഴ് സിനിമാ മേഖലയിലെ പ്രമുഖരും വിവിധ രാഷ്ട്രീയ നേതാക്കളും അനുശോചനം രേഖപ്പെടുത്തി.
