ബ്രിസ്ബേൻ: ഓസ്ട്രേലിയയിലെ ഗ്രേറ്റ് ബാരിയർ റീഫ് മേഖലയിൽ വംശനാശഭീഷണി നേരിടുന്ന പച്ചക്കടലാമകളെ സംരക്ഷിക്കുന്നതിനായി നടപ്പിലാക്കിയ ചരിത്രപരമായ പദ്ധതിക്ക് വൻ വിജയം. ഗ്രേറ്റ് ബാരിയർ റീഫിലെ റെയ്ൻ ഐലൻഡിൽ നിന്നും സർ ചാൾസ് ഹാർഡി ഐലൻഡിലേക്ക് വിജയകരമായി മാറ്റിസ്ഥാപിച്ച ഏകദേശം ഒമ്പതിനായിരത്തോളം കടലാമ മുട്ടകളിൽ 82 ശതമാനവും വിരിഞ്ഞു. ഇതിലൂടെ 9,100-ലധികം പച്ചക്കടലാമ കുഞ്ഞുങ്ങളാണ് സുരക്ഷിതമായി കടലിലേക്ക് യാത്രയായത്.
ആഗോളതാപനവും കാലാവസ്ഥാ വ്യതിയാനവും കടലാമകളുടെ വംശവർദ്ധനവിനെ ഗുരുതരമായി ബാധിക്കുന്ന പശ്ചാത്തലത്തിലാണ് ശാസ്ത്രജ്ഞർ ഈ അപൂർവ്വ പുനരധിവാസ പദ്ധതിക്ക് രൂപം നൽകിയത്. കടൽത്തീരങ്ങളിലെ മണലിന്റെ താപനില ഉയരുന്നതിനനുസരിച്ച് വിരിയുന്ന കടലാമകളിൽ ഭൂരിഭാഗവും പെൺകുഞ്ഞുങ്ങളായി മാറുന്ന അവസ്ഥ നിലവിലുണ്ട്. ലിംഗാനുപാതത്തിലെ ഈ അസന്തുലിതാവസ്ഥ പരിഹരിക്കാനും കൂടുതൽ ആൺകുഞ്ഞുങ്ങൾ ജനിക്കുന്നുണ്ടെന്ന് ഉറപ്പാക്കാനുമായിരുന്നു താരതമ്യേന തണുപ്പുകൂടിയ മണൽപ്രദേശമായ സർ ചാൾസ് ഹാർഡി ദ്വീപിലേക്ക് മുട്ടകൾ മാറ്റിയത്.
ശാസ്ത്രജ്ഞരും തദ്ദേശീയ ആദിവാസി വിഭാഗങ്ങളായ ട്രഡീഷണൽ ഓണേഴ്സും സംയുക്തമായി കൈകോർത്താണ് ഈ ദൗത്യം വിജയത്തിലെത്തിച്ചത്. ആധുനിക ശാസ്ത്രീയ അറിവുകളും തദ്ദേശീയ ജനവിഭാഗങ്ങളുടെ പരമ്പരാഗത പ്രകൃതി സംരക്ഷണ രീതികളും ഒന്നിച്ച് ചേർന്നപ്പോൾ വംശനാശത്തിന്റെ വക്കിലായിരുന്ന പച്ചക്കടലാമകളുടെ സംരക്ഷണത്തിൽ വലിയൊരു നാഴികക്കല്ലാണ് ഓസ്ട്രേലിയൻ തീരത്ത് പിറന്നിരിക്കുന്നത്. വരും വർഷങ്ങളിലും പദ്ധതി കൂടുതൽ ശക്തമായി മുന്നോട്ട് കൊണ്ടുപോകാനാണ് അധികൃതരുടെ തീരുമാനം.
