തിരുവനന്തപുരം: മന്ത്രിമാരുടെ പേഴ്സണൽ സ്റ്റാഫ് നിയമനങ്ങളെയും സാമ്പത്തിക ബാധ്യതകളെയും ചൊല്ലി മുഖ്യമന്ത്രി വി.ഡി. സതീശനും പ്രതിപക്ഷ നേതാവ് പിണറായി വിജയനും തമ്മിൽ കനത്ത വാക്പോര്. ഇതിനിടെ രണ്ടാം പിണറായി സർക്കാരിന്റെ കാലത്തെ പേഴ്സണൽ സ്റ്റാഫ് നിയമനം സംബന്ധിച്ച ഔദ്യോഗിക കണക്കുകൾ പുറത്തുവന്നു. മുൻ സർക്കാരിന്റെ കാലത്ത് മന്ത്രിമാരുടെ പേഴ്സണൽ സ്റ്റാഫുകളായി ആകെ 726 പേരെയാണ് നിയമിച്ചിരുന്നതെന്ന് രേഖകൾ വ്യക്തമാക്കുന്നു.
മന്ത്രിസഭാ പുനഃസംഘടനയെ തുടർന്ന് മന്ത്രിമാർ മാറിയപ്പോൾ പുനർനിയമിക്കപ്പെട്ട 61 പേരെക്കൂടി ഉൾപ്പെടുത്തുമ്പോൾ ആകെ നിയമനങ്ങളുടെ എണ്ണം 787 ആയി ഉയരുമെന്നാണ് കണക്കുകൾ ചൂണ്ടിക്കാണിക്കുന്നത്. മുൻ സർക്കാരുകളുടെ കാലത്തും സമാനമായ രീതികൾ തുടർന്നിരുന്നുവെങ്കിലും പേഴ്സണൽ സ്റ്റാഫ് നിയമനങ്ങളും പെൻഷൻ ഉൾപ്പെടെയുള്ള ആനുകൂല്യങ്ങളും മുൻപും വലിയ രാഷ്ട്രീയ വിമർശനങ്ങൾക്ക് വഴിവെച്ചിരുന്നു.
ഇപ്പോഴത്തെ രാഷ്ട്രീയ പോരിൽ പിണറായി വിജയൻ മുഖ്യമന്ത്രിയായിരുന്ന കാലത്തെ കണക്കുകളും നിലവിലെ സർക്കാരിന്റെ സ്ഥിതിയും തമ്മിലുള്ള താരതമ്യമാണ് പ്രധാനമായും ചർച്ചയാകുന്നത്. പിണറായി വിജയൻ മുഖ്യമന്ത്രിയായിരുന്ന ഘട്ടത്തിൽ അദ്ദേഹത്തിന്റെ ഓഫീസിൽ മാത്രം 44 പേരെയാണ് പേഴ്സണൽ സ്റ്റാഫായി നിയമിച്ചിരുന്നത്. ഇതിൽ ശാസ്ത്ര ഉപദേഷ്ടാവായി പ്രവർത്തിച്ച എം.സി. ദത്തൻ ശമ്പളം വാങ്ങാതെയാണ് സേവനം അനുഷ്ഠിച്ചത്. ഇതിനുപുറമെ, പ്രതിവർഷം 84 ലക്ഷത്തോളം രൂപ ചെലവഴിച്ച് 12 അംഗ സോഷ്യൽ മീഡിയ വിഭാഗത്തെയും അന്നത്തെ സർക്കാർ നിയമിച്ചിരുന്നു.
എന്നാൽ ഒരേ സമയം ഇത്രയധികം പേർ ജോലി ചെയ്തിട്ടില്ലെന്നും, സർക്കാരിന്റെ കാലാവധിക്കിടയിൽ പലരും മാറുകയും പകരം പുതിയ ആളുകൾ ചുമതലയേൽക്കുകയുമാണ് ചെയ്തതെന്നുമുള്ള വിശദീകരണവും ഇതിന് മറുപടിയായി ഉയരുന്നുണ്ട്. എങ്കിലും പുറത്തുവന്ന കണക്കുകൾ മുൻനിർത്തി ഇരുപക്ഷവും തമ്മിലുള്ള രാഷ്ട്രീയ വാദപ്രതിവാദങ്ങൾ കൂടുതൽ ശക്തമായി തുടരുകയാണ്.
