കൊച്ചി: നടിമാരായ ലക്ഷ്മിപ്രിയയ്ക്കും ശ്വേത മേനോനും എതിരെ നൽകിയ അപകീർത്തിക്കേസിൽ അന്വേഷണം നടത്തുന്ന പാലാരിവട്ടം സബ് ഇൻസ്പെക്ടറെ അന്വേഷണത്തിൽ നിന്ന് മാറ്റണമെന്ന് ആവശ്യപ്പെട്ട് നടി അൻസിബ ഹസൻ സംസ്ഥാന പൊലീസ് മേധാവിക്കും കൊച്ചി സിറ്റി പൊലീസ് കമ്മിഷണർക്കും പരാതി നൽകി. നിലവിലെ അന്വേഷണം തൃപ്തികരമല്ലെന്നും അന്വേഷണത്തിൽ വീഴ്ചയുണ്ടെന്നും പരാതിയിൽ ആരോപിക്കുന്നു.
ഒരു യൂട്യൂബ് ചാനൽ അഭിമുഖത്തിലൂടെ ലക്ഷ്മിപ്രിയ തനിക്കെതിരെ ഗുരുതരമായ ആരോപണങ്ങൾ ഉന്നയിച്ചെന്നും സമൂഹമാധ്യമങ്ങളിലൂടെ അപകീർത്തികരമായ പ്രചാരണങ്ങൾ നടന്നുവെന്നുമാണ് അൻസിബയുടെ പരാതി. ഈ പ്രചാരണങ്ങൾക്ക് പിന്നിൽ ശ്വേത മേനോനാണെന്നും പരാതിയിൽ ആരോപിച്ചിട്ടുണ്ട്. ഇതുമായി ബന്ധപ്പെട്ടാണ് നേരത്തെ അൻസിബ പാലാരിവട്ടം പൊലീസിൽ പരാതി നൽകിയത്.
നടൻ ടിനി ടോം തനിക്കെതിരെ അപവാദ പ്രചാരണം നടത്തിയെന്ന ആരോപണത്തെ തുടർന്നാണ് വിവാദങ്ങൾ ആരംഭിച്ചത്. പിന്നീട് വിഷയം താരസംഘടനയായ ‘അമ്മ’യിലും ചർച്ചയായിരുന്നു. ജനറൽ ബോഡി യോഗത്തിനിടെ ഉണ്ടായ തർക്കങ്ങൾക്കൊടുവിൽ ശ്വേത മേനോൻ ഉൾപ്പെടെയുള്ള ചില ഭാരവാഹികൾ സ്ഥാനമൊഴിഞ്ഞിരുന്നു. നിലവിലെ അന്വേഷണത്തിൽ അതൃപ്തി പ്രകടിപ്പിച്ചാണ് അൻസിബ ഇപ്പോൾ ഉന്നത പൊലീസ് ഉദ്യോഗസ്ഥരെ സമീപിച്ചിരിക്കുന്നത്.
