പത്തനംതിട്ട: റാന്നിയിൽ ശക്തമായ മഴയെ തുടർന്ന് വെള്ളപ്പൊക്കസമാന സാഹചര്യം രൂപപ്പെട്ടു. പെട്ടെന്നുയർന്ന വെള്ളത്തിൽ നിരവധി വീടുകൾ ഒറ്റപ്പെടുകയും താഴ്ന്ന പ്രദേശങ്ങളിൽ താമസിച്ചിരുന്നവർ കുടുങ്ങുകയും ചെയ്തതിനെ തുടർന്ന് രക്ഷാപ്രവർത്തനം ശക്തമാക്കി.
ഫയർ ആൻഡ് റെസ്ക്യൂ സേനയുടെ ഡിങ്കി ബോട്ടുകൾ ഉപയോഗിച്ചാണ് വീടുകളിൽ കുടുങ്ങിയവരെ സുരക്ഷിത കേന്ദ്രങ്ങളിലേക്ക് മാറ്റുന്നത്. പ്രായമായവരെയും കുട്ടികളെയും ഉൾപ്പെടെ അപകടസാധ്യതയുള്ളവർക്കാണ് മുൻഗണന നൽകി ഒഴിപ്പിക്കൽ നടപടികൾ തുടരുന്നത്.
മഴ തുടരുന്നതിനാൽ നദികളുടെയും തോടുകളുടെയും ജലനിരപ്പ് ഉയരാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി. താഴ്ന്ന പ്രദേശങ്ങളിൽ താമസിക്കുന്നവർ ജാഗ്രത പാലിക്കണമെന്നും ആവശ്യമായാൽ ദുരിതാശ്വാസ ക്യാമ്പുകളിലേക്ക് മാറാൻ തയ്യാറാകണമെന്നും ജില്ലാ ഭരണകൂടം നിർദേശിച്ചു.
