ലണ്ടൻ: മമ്മിയാക്കപ്പെട്ട മനുഷ്യശരീരഭാഗങ്ങൾ വാങ്ങി ഉപയോഗിക്കുന്ന ആഗോള വിപണി അതിവേഗം വളരുന്നതായും, ഇത് ഉപഭോക്താക്കൾക്കും തപാൽ ജീവനക്കാർക്കും ഗുരുതരമായ ആരോഗ്യഭീഷണി ഉയർത്തുന്നുണ്ടെന്നും ഗവേഷകർ. ‘ദി റിയൽ മമ്മീസ് കഴ്സ്’ (The Real Mummy’s Curse) എന്ന പേരിൽ ‘ഇന്റർനാഷണൽ ജേണൽ ഓഫ് കൾച്ചറൽ പ്രോപ്പർട്ടി’യിലാണ് (Cambridge University Press) ഇതുസംബന്ധിച്ച പഠനം പ്രസിദ്ധീകരിച്ചിരിക്കുന്നത്.
തലകൾ, കൈകൾ, കാലുകൾ തുടങ്ങിയ നൂറ്റാണ്ടുകൾ പഴക്കമുള്ള മനുഷ്യശരീരഭാഗങ്ങൾ സോഷ്യൽ മീഡിയ, ഇ-കോമേഴ്സ് പ്ലാറ്റ്ഫോമുകൾ, ലേല കേന്ദ്രങ്ങൾ എന്നിവ വഴിയാണ് നിയമവിരുദ്ധമായി പ്രധാനമായും വിറ്റഴിക്കപ്പെടുന്നത്. എന്നാൽ, ഇവ കൈകാര്യം ചെയ്യുന്നവർക്ക് ഇതുണ്ടാക്കുന്ന ആരോഗ്യപ്രശ്നങ്ങളെക്കുറിച്ച് യാതൊരു ധാരണയുമില്ലെന്ന് പഠനം വ്യക്തമാക്കുന്നു.
പ്രധാന കണ്ടെത്തലുകൾ:
പഠനവിധേയമാക്കിയ 128 ഓൺലൈൻ പോസ്റ്റുകളിൽ പകുതിയിലധികവും (51.6%) പൂർണ്ണമായോ ഭാഗികമായോ മമ്മിയാക്കപ്പെട്ട തലകളായിരുന്നു.
ഇവ സംരക്ഷിക്കുന്നതിനായി മുൻകാലങ്ങളിൽ ഉപയോഗിച്ചിരുന്ന ആർസെനിക്, മെർക്കുറി, ഈയം തുടങ്ങിയ മാരകമായ വിഷലോഹങ്ങളും രാസവസ്തുക്കളും മമ്മികളിൽ അടങ്ങിയിട്ടുണ്ട്.
നൂറ്റാണ്ടുകൾ പഴക്കമുള്ള മമ്മികളിൽ നിർജ്ജീവമായി കിടക്കുന്ന ഫംഗസ് വിത്തുകൾ (Fungal Spores) അവ കൈകാര്യം ചെയ്യുമ്പോൾ വായുവിൽ കലരുകയും ശ്വാസകോശ രോഗങ്ങൾക്ക് കാരണമാകുകയും ചെയ്യും.
അസ്പർജില്ലസ് (Aspergillus) ഫംഗസ് ശ്വസിച്ചതാണ് 1970-കളിൽ പോളണ്ടിലെ കാസിമിർ നാലാമൻ രാജാവിന്റെ കല്ലറ തുറന്ന ശാസ്ത്രജ്ഞരുടെ മരണത്തിന് കാരണമായത്. ഈജിപ്ഷ്യൻ ഫറവോ ടുട്ടൻഖാമന്റെ കല്ലറ തുറക്കുന്നതിന് നേതൃത്വം നൽകിയ ലോർഡ് കർനാർവോണിന്റെ മരണത്തിനു പിന്നിലും ഇതാണെന്നാണ് കരുതപ്പെടുന്നത്.
വ്യാപാരികൾ സാധാരണ കൊറിയർ, തപാൽ സർവീസുകൾ വഴിയാണ് ഇവ അയക്കുന്നത്. അതിനാൽ ആവശ്യമായ സുരക്ഷാ മാനദണ്ഡങ്ങളോ പി.പി.ഇ (PPE) കിറ്റുകളോ ഇല്ലാതെ ഇവ കൈകാര്യം ചെയ്യുന്ന കൊറിയർ ജീവനക്കാർ, കസ്റ്റംസ് ഉദ്യോഗസ്ഥർ എന്നിവരിലേക്കും അപകടസാധ്യത പടരുന്നു.
മമ്മിയാക്കപ്പെട്ട ഇത്തരം ശരീരഭാഗങ്ങൾ അനുയോജ്യമായ താപനിലയോ സംരക്ഷണ ഗ്ലാസ് കവറുകളോ ഇല്ലാതെ തുറസ്സായ സ്ഥലങ്ങളിൽ സൂക്ഷിക്കുന്നത് വായു മലിനീകരണത്തിനും ഗുരുതര ആരോഗ്യ പ്രശ്നങ്ങൾക്കും വഴിവെക്കുമെന്ന് സ്റ്റാഫോർഡ്ഷെയർ സർവ്വകലാശാലയിലെ പ്രൊഫസർ കിർസ്റ്റി സ്ക്വയേഴ്സ് മുന്നറിയിപ്പ് നൽകുന്നു.
