പനജി: അണ്ടർ-17 വനിതാ ഫുട്ബോൾ ലോകകപ്പിലേക്ക് യോഗ്യത നേടുമെന്ന ഇന്ത്യയുടെ പ്രതീക്ഷകൾക്ക് തിരിച്ചടി. നിർണായക മത്സരത്തിൽ ചൈനയോട് പരാജയപ്പെട്ടതോടെയാണ് ഇന്ത്യയുടെ ലോകകപ്പ് സ്വപ്നം അവസാനിച്ചത്.
ഏഷ്യൻ ചാമ്പ്യൻഷിപ്പിൽ മികച്ച പ്രകടനം പ്രതീക്ഷിച്ചിരുന്ന ഇന്ത്യൻ ടീം നിർണായക ഘട്ടത്തിൽ മികവ് പുറത്തെടുക്കാനാകാതെ പോയി. മത്സരത്തിൽ ചൈന ആധിപത്യം പുലർത്തിയപ്പോൾ ഇന്ത്യൻ ആക്രമണനിരയ്ക്ക് അവസരങ്ങൾ ഗോളാക്കി മാറ്റാനായില്ല.
ഈ വർഷം വിവിധ പ്രായവിഭാഗങ്ങളിലായി നാല് ഇന്ത്യൻ ടീമുകൾ ഏഷ്യൻ തല മത്സരങ്ങളിൽ പങ്കെടുത്തിരുന്നുവെങ്കിലും ലോകകപ്പിലേക്ക് യോഗ്യത നേടാൻ ഒരു ടീമിനും സാധിച്ചില്ല. ആതിഥേയരെന്ന നിലയിൽ അല്ലാതെ മത്സരഫലത്തിന്റെ അടിസ്ഥാനത്തിൽ ലോകകപ്പിലെത്താനുള്ള ഇന്ത്യയുടെ കാത്തിരിപ്പും ഇതോടെ തുടരുകയാണ്.
