ലണ്ടൻ:ഇംഗ്ലണ്ട് ദേശീയ ടീമിന്റെ പരിചയസമ്പന്നനായ മധ്യനിരതാരം ജോർദാൻ ഹെൻഡേഴ്സണെ പ്രീമിയർ ലീഗ് ക്ലബ്ബായ ചെൽസി രണ്ട് വർഷത്തെ കരാറിൽ സ്വന്തമാക്കി. ബ്രെൻ്റ്ഫോർഡുമായുള്ള കരാർ പരസ്പര ധാരണപ്രകാരം അവസാനിപ്പിച്ചതിന് പിന്നാലെയാണ് 36-കാരൻ ചെൽസിയിലേക്ക് ചേർന്നത്.
ക്ലബ്ബിന്റെ ചരിത്രവും പരിശീലകൻ സാബി അലോൻസോയോടുള്ള ബഹുമാനവും നിലവിലെ താരനിരയുടെ നിലവാരവുമാണ് ചെൽസിയിലേക്ക് വരാൻ പ്രേരിപ്പിച്ചതെന്ന് ഹെൻഡേഴ്സൺ പറഞ്ഞു. ടീമിന്റെ വിജയത്തിനായി തന്റെ അനുഭവം പരമാവധി ഉപയോഗപ്പെടുത്തുമെന്നും അദ്ദേഹം വ്യക്തമാക്കി.
സണ്ടർലൻഡിലൂടെയാണ് ഹെൻഡേഴ്സൺ സീനിയർ കരിയർ ആരംഭിച്ചത്. തുടർന്ന് ലിവർപൂളിന്റെ നായകനായി പ്രീമിയർ ലീഗ്, യുവേഫ ചാമ്പ്യൻസ് ലീഗ് ഉൾപ്പെടെ നിരവധി പ്രധാന കിരീടങ്ങൾ ടീമിന് നേടിക്കൊടുത്തു. പിന്നീട് അൽ ഇത്തിഫാഖ്, അയാക്സ്, ബ്രെൻ്റ്ഫോർഡ് എന്നീ ക്ലബ്ബുകൾക്കായും കളിച്ചു.
കഴിഞ്ഞ സീസണിൽ പ്രീമിയർ ലീഗിൽ പത്താം സ്ഥാനത്ത് ഫിനിഷ് ചെയ്ത ചെൽസി, പുതിയ സീസണിൽ പരിചയസമ്പന്നരായ താരങ്ങളുടെ സാന്നിധ്യം ടീമിന്റെ നേതൃത്വശേഷി ശക്തിപ്പെടുത്തുമെന്ന പ്രതീക്ഷയിലാണ് ഹെൻഡേഴ്സണെ ടീമിലെത്തിച്ചത്.
