കാൻബറ: ഓസ്ട്രേലിയൻ ക്യാപിറ്റൽ ടെറിട്ടറിയിൽ (ACT) സംഘടിത കുറ്റകൃത്യങ്ങൾക്കെതിരെ പോലീസ് നടത്തിയ വൻ ഓപ്പറേഷനിൽ വീടുകൾ കേന്ദ്രീകരിച്ച് പ്രവർത്തിച്ചിരുന്ന വൻ കഞ്ചാവ് തോട്ടങ്ങൾ തകർത്തു. പരിശോധനയിൽ 1,586 കഞ്ചാവ് ചെടികളും 70 കിലോഗ്രാമോളം ഉണങ്ങിയ കഞ്ചാവും ആറ് വാഹനങ്ങളും ഏകദേശം 86,000 ഓസ്ട്രേലിയൻ ഡോളറും പോലീസ് പിടിച്ചെടുത്തു. മേഖലയിലുടനീളം 15 കേന്ദ്രങ്ങളിലായി നടത്തിയ പരിശോധനകളെത്തുടർന്ന് തിങ്കൾ, ചൊവ്വ ദിവസങ്ങളിലായി ഒൻപത് പേരെയാണ് പോലീസ് അറസ്റ്റ് ചെയ്തത്. ഇതിൽ അഞ്ചുപേർ സാധുവായ വിസയോ രേഖകളോ ഇല്ലാത്ത അനധികൃത കുടിയേറ്റക്കാരാണെന്ന് എ.സി.ടി പോലീസ് സ്ഥിരീകരിച്ചു.
പിടിയിലായവർക്കെതിരെ സംഘടിത കുറ്റകൃത്യങ്ങളിൽ ഏർപ്പെടൽ, വാണിജ്യാടിസ്ഥാനത്തിൽ ലഹരിവസ്തുക്കൾ കൃഷി ചെയ്യൽ, ലഹരിമരുന്ന് കടത്ത് തുടങ്ങിയ ഗുരുതരമായ വകുപ്പുകൾ ചുമത്തിയാണ് കേസെടുത്തിരിക്കുന്നത്. എ.സി.ടി പോലീസിനൊപ്പം ഓസ്ട്രേലിയൻ ഫെഡറൽ പോലീസും (AFP) ബോർഡർ ഫോഴ്സും സംയുക്തമായാണ് ഓപ്പറേഷനിൽ പങ്കെടുത്തത്. അന്വേഷണത്തിന്റെ ഭാഗമായി ന്യൂ സൗത്ത് വെയിൽസ് അതിർത്തിയിലുള്ള ജെറാബോംബെറയിലും സമാനമായ കഞ്ചാവ് കൃഷി കേന്ദ്രം കണ്ടെത്തിയതിനെത്തുടർന്ന് എൻ.എസ്.ഡബ്ല്യു പോലീസും നടപടി സ്വീകരിച്ചു.
വീടുകൾക്കുള്ളിൽ ലഹരിമരുന്ന് കൃഷി ചെയ്യുന്ന സംഘങ്ങളെ ലക്ഷ്യമിട്ട് എ.സി.ടിയിൽ നാളിതുവരെ നടന്നിട്ടുള്ളതിൽ വച്ച് ഏറ്റവും വലിയ ഓപ്പറേഷനാണിതെന്ന് ഡ്രഗ്സ് ആൻഡ് ഓർഗനൈസ്ഡ് ക്രൈം വിഭാഗം വ്യക്തമാക്കി. വൻകിട ക്രിമിനൽ സംഘങ്ങൾക്കുള്ള പ്രധാന വരുമാന മാർഗ്ഗമാണ് കഞ്ചാവ് വ്യാപാരമെന്നും, ഇത്തരം ലഹരി വിൽപ്പനയിലൂടെ ലഭിക്കുന്ന പണം മറ്റ് കള്ളക്കടത്തുകൾക്കും വലിയ കുറ്റകൃത്യങ്ങൾക്കുമാണ് ഇവർ വിനിയോഗിക്കുന്നതെന്നും അന്വേഷണ സംഘം ചൂണ്ടിക്കാട്ടി. വ്യാജ തിരിച്ചറിയൽ രേഖകൾ നൽകി ഓൺലൈൻ പ്ലാറ്റ്ഫോമുകൾ വഴി സ്വകാര്യമായി വീടുകൾ വാടകയ്ക്കെടുത്താണ് സംഘം ഈ അനധികൃത കൃഷി നടത്തിയിരുന്നത്. വീടുകൾ വാടകയ്ക്ക് നൽകുന്ന ഉടമകൾ കൃത്യമായ രേഖകൾ പരിശോധിക്കണമെന്നും ഇടയ്ക്കിടെ പരിശോധനകൾ നടത്തണമെന്നും പോലീസ് മുന്നറിയിപ്പ് നൽകിയിട്ടുണ്ട്.
