തിരുവനന്തപുരം: മാസപ്പടി കേസിൽ അന്വേഷണം നടത്തുന്നതിൽ സർക്കാർ യാതൊരു തിടുക്കവും കാട്ടിയിട്ടില്ലെന്ന് മുഖ്യമന്ത്രി വി.ഡി. സതീശൻ. വിഷയത്തിൽ കേരള പോലീസ് അന്വേഷണം നടത്തേണ്ടത് സർക്കാരിന്റെ ബാധ്യതയാണെന്നും അദ്ദേഹം പറഞ്ഞു. ആരെയും വേട്ടയാടുകയോ പ്രതികാര നടപടി സ്വീകരിക്കുകയോ ചെയ്യില്ലെന്നും മുഖ്യമന്ത്രി വ്യക്തമാക്കി.
സിഎംആർഎൽ–എക്സാലോജിക് ഇടപാടുമായി ബന്ധപ്പെട്ട് എൻഫോഴ്സ്മെന്റ് ഡയറക്ടറേറ്റ് നൽകിയ റിപ്പോർട്ടിന്റെ അടിസ്ഥാനത്തിലാണ് സംസ്ഥാനത്ത് തുടർ അന്വേഷണ നടപടികൾക്ക് നീക്കം. മുൻ മുഖ്യമന്ത്രി പിണറായി വിജയൻ, മന്ത്രി മുഹമ്മദ് റിയാസ്, വീണ വിജയൻ എന്നിവരടക്കമുള്ളവർക്കെതിരെ അഴിമതി നിരോധന നിയമപ്രകാരം അന്വേഷണം നടത്താമെന്ന് നിയമോപദേശം ലഭിച്ചതായും റിപ്പോർട്ടുകൾ വ്യക്തമാക്കുന്നു.
ഇഡിയുടെ റിപ്പോർട്ടിൽ ഉന്നയിച്ച കാര്യങ്ങളിൽ സംസ്ഥാന പോലീസ് അന്വേഷണം നടത്തണമെന്ന നിലപാടിലാണ് സർക്കാർ. കേസിൽ പ്രത്യേക അന്വേഷണ സംഘത്തെ രൂപീകരിക്കുന്നതുമായി ബന്ധപ്പെട്ട നടപടികളും പുരോഗമിക്കുകയാണ്. ക്രൈംബ്രാഞ്ചിന്റെ നേതൃത്വത്തിൽ അന്വേഷണം നടത്താനാണ് സർക്കാർ ആലോചിക്കുന്നതെന്നാണ് റിപ്പോർട്ട്.
അതേസമയം, കേസിൽ അന്വേഷണം ആരംഭിക്കുന്നതിന് മുമ്പുതന്നെ രാഷ്ട്രീയ വിവാദവും ശക്തമായിട്ടുണ്ട്. അന്വേഷണം രാഷ്ട്രീയപ്രേരിതമാണെന്ന ആരോപണം സിപിഎം ഉന്നയിക്കുമ്പോൾ, ഇഡി റിപ്പോർട്ടിൽ പരാമർശിച്ച കാര്യങ്ങളിൽ സംസ്ഥാനതല അന്വേഷണം ആവശ്യമാണെന്ന നിലപാടാണ് സർക്കാർ സ്വീകരിക്കുന്നത്.
