കോതമംഗലം: ഓടിക്കൊണ്ടിരുന്ന സ്വകാര്യ ബസ്സിൽ നിന്ന് തെറിച്ചുവീണ് ചികിത്സയിലായിരുന്ന കന്യാസ്ത്രീ അന്തരിച്ചു. കോഴിപ്പിള്ളി എസ്.ഡി. കോൺവെന്റിലെ സിസ്റ്റർ ഹെയ്സ്ലെറ്റ് (56) ആണ് മരിച്ചത്. ഊന്നുകൽ ലിറ്റിൽ ഫ്ലവർ സ്കൂളിലെ റിട്ടയേർഡ് അധ്യാപികയായിരുന്നു ഇവർ.
ചൊവ്വാഴ്ച രാവിലെ 8.20-ഓടെ കോഴിപ്പിള്ളി ഗവ. എൽ.പി. സ്കൂളിന് സമീപത്തുവെച്ചായിരുന്നു അപകടം സംഭവിച്ചത്. ബസ് വളവ് തിരിയുന്നതിനിടെ അശ്രദ്ധമായി വാതിൽ തുറന്നിട്ടിരുന്നത് കാരണം സിസ്റ്റർ ഹെയ്സ്ലെറ്റ് പുറത്തേക്ക് തെറിച്ചുവീഴുകയായിരുന്നു. ബസിൽ വിദ്യാർത്ഥികളടക്കം നിരവധി യാത്രക്കാർ ഉണ്ടായിരുന്നു.
ഗുരുതരമായി പരിക്കേറ്റ ഇവർക്ക് ആലുവ രാജഗിരി ആശുപത്രിയിൽ ചികിത്സ നൽകിയിരുന്നെങ്കിലും, ബുധനാഴ്ച പുലർച്ചെ 5 മണിയോടെ മരണം സംഭവിക്കുകയായിരുന്നു. സംഭവത്തിൽ കോതമംഗലം പോലീസ് കേസെടുത്ത് അന്വേഷണം ആരംഭിച്ചു.
വ്യാഴാഴ്ച രാവിലെ 6 മണിയോടെ മൃതദേഹം കോഴിപ്പിള്ളി എസ്.ഡി. കോൺവെന്റിൽ എത്തിക്കും. സംസ്കാരം വൈകിട്ട് 3.30-ന് എസ്.ഡി. കോൺവെന്റ് പ്രോവിൻസ് ഹൗസിൽ നടക്കും.
