കാൻബറ: ഓസ്ട്രേലിയൻ രാഷ്ട്രീയ ചരിത്രത്തിൽ അഭൂതപൂർവ്വമായ അട്ടിമറി രേഖപ്പെടുത്തി പ്രമുഖ സർവേ ഫലങ്ങൾ പുറത്ത്. ഓസ്ട്രേലിയയിലെ ഏറ്റവും വലിയ ജനഹിത പരിശോധനകളിലൊന്നായ ‘ന്യൂസ്പോൾ’ സർവേയിൽ, ചരിത്രത്തിലാദ്യമായി ഭരണകക്ഷിയായ ലേബർ പാർട്ടിയേക്കാൾ കൂടുതൽ പ്രാഥമിക വോട്ട് പിന്തുണ പോളിൻ ഹാൻസന്റെ വൺ നേഷൻ പാർട്ടി സ്വന്തമാക്കി. 1,240 വോട്ടർമാർക്കിടയിൽ നടത്തിയ സർവേയിൽ വൺ നേഷൻ 31 ശതമാനം പിന്തുണ നേടിയപ്പോൾ ലേബർ പാർട്ടി 30 ശതമാനത്തിലേക്കും സഖ്യകക്ഷികൾ (Coalition) 18 ശതമാനത്തിലേക്കും ചുരുങ്ങി.
കഴിഞ്ഞ ഡിസംബറിലുണ്ടായ ബോണ്ടി ബീച്ച് ഭീകരാക്രമണം, ഇന്ധനപ്രതിസന്ധി കൈകാര്യം ചെയ്യുന്നതിൽ വന്ന വീഴ്ചകൾ, പണപ്പെരുപ്പം, ഫെഡറൽ ബജറ്റിനെതിരെയുള്ള ജനരോഷം എന്നിവയാണ് ലേബർ പാർട്ടിയുടെ ജനപ്രീതി ഇടിയാൻ കാരണമായത്. 2025 മെയ് മാസത്തിൽ നടന്ന ഫെഡറൽ തിരഞ്ഞെടുപ്പിൽ വെറും 6.4 ശതമാനം വോട്ട് മാത്രം നേടിയ സ്ഥാനത്താണ് വൺ നേഷൻ പാർട്ടിയുടെ ഈ വൻ കുതിപ്പ്. ജൂലിയ ഗില്ലാർഡ് സർക്കാരിന്റെ കാലത്തിനുശേഷം ലേബർ പാർട്ടി നേരിടുന്ന ഏറ്റവും വലിയ തിരിച്ചടിയാണിത്. റെഡ്ബ്രിഡ്ജ്, യൂഗോവ് സർവേകളിലും വൺ നേഷൻ ലേബർ പാർട്ടിയെ മറികടന്നിട്ടുണ്ട്.
പാർട്ടിയുടെ വർദ്ധിച്ചുവരുന്ന ജനപ്രീതിയുടെ പശ്ചാത്തലത്തിൽ, താൻ സെനറ്റിൽ നിന്നും പ്രധാനമന്ത്രി പദവി ഉൾപ്പെടെ നിർണ്ണയിക്കുന്ന അധോസഭയിലേക്ക് മത്സരിക്കുന്നതിനെക്കുറിച്ച് ആലോചിക്കുകയാണെന്ന് വൺ നേഷൻ പാർട്ടി നേതാവ് പോളിൻ ഹാൻസൺ വെളിപ്പെടുത്തി. അടുത്ത തിരഞ്ഞെടുപ്പിന് ഒന്നര മുതൽ രണ്ട് വർഷം വരെ സമയമുള്ളതിനാൽ പാർട്ടി നേതൃത്വവുമായി ആലോചിച്ച് അന്തിമ തീരുമാനമെടുക്കുമെന്നും പ്രാദേശിക ക്വീൻസ്ലൻഡ് സന്ദർശനങ്ങൾക്ക് ശേഷം അവർ വ്യക്തമാക്കി.
അതേസമയം, പ്രധാനമന്ത്രി ആന്റണി അൽബാനീസിന്റെ ജനപ്രീതി 2022-ൽ അദ്ദേഹം അധികാരമേറ്റ ശേഷമുള്ള ഏറ്റവും താഴ്ന്ന നിലയിലെത്തി. സർവേയിൽ പങ്കെടുത്ത 60 ശതമാനം ആളുകളും അദ്ദേഹത്തിന്റെ പ്രവർത്തനത്തിൽ അതൃപ്തി രേഖപ്പെടുത്തിയപ്പോൾ 36 ശതമാനം പേർ മാത്രമാണ് അനുകൂലിച്ചത്. പ്രതിപക്ഷ നേതാവ് ആംഗസ് ടെയ്ലറുടെ ജനപ്രീതിയിൽ നേരിയ മുന്നേറ്റം രേഖപ്പെടുത്തിയിട്ടുണ്ട്. രാജ്യത്തെ നിലവിലെ രാഷ്ട്രീയ വ്യവസ്ഥിതിയിൽ വലിയൊരു മാറ്റം വേണമെന്ന് ഓസ്ട്രേലിയയിലെ 70 ശതമാനത്തോളം ജനങ്ങൾ ആഗ്രഹിക്കുന്നതായും ജീവിതച്ചെലവ്, ഭവനപ്രതിസന്ധി, കുടിയേറ്റം എന്നിവയോടുള്ള ഭീതിയാണ് ഈ ചിന്താഗതിക്ക് പിന്നിലെന്നും രാഷ്ട്രീയ നിരീക്ഷകർ വിലയിരുത്തുന്നു.
