മോസ്കോ: ഉക്രെയ്ൻ യുദ്ധത്തിന്റെ പശ്ചാത്തലത്തിൽ കനത്ത സുരക്ഷയിൽ നടന്ന വിക്ടറി ഡേ പരേഡിൽ റഷ്യയുടെ വിജയം സുനിശ്ചിതമാണെന്ന് പ്രസിഡന്റ് വ്ളാഡിമിർ പുടിൻ പ്രഖ്യാപിച്ചു. രണ്ടാം ലോകമഹായുദ്ധത്തിൽ നാസി ജർമ്മനിക്കെതിരെ നേടിയ വിജയത്തിന്റെ വാർഷികാഘോഷ വേളയിൽ സംസാരിക്കുകയായിരുന്നു അദ്ദേഹം.
രണ്ടാം ലോകമഹായുദ്ധത്തിലെ പൂർവ്വികരുടെ പോരാട്ടം നിലവിൽ ഉക്രെയ്നിൽ ‘പ്രത്യേക സൈനിക നീക്കം’ നടത്തുന്ന സൈനികർക്ക് പ്രചോദനമാണെന്ന് പുടിൻ പറഞ്ഞു. നാറ്റോ സഖ്യത്തിന്റെ പിന്തുണയോടെയുള്ള ആക്രമണങ്ങളെ അതിജീവിച്ച് റഷ്യൻ വീരന്മാർ മുന്നേറുകയാണെന്നും വിജയം എന്നും റഷ്യയ്ക്കൊപ്പമായിരിക്കുമെന്നും അദ്ദേഹം അവകാശപ്പെട്ടു.
മുൻ വർഷങ്ങളെ അപേക്ഷിച്ച് വളരെ ലളിതമായാണ് ഇത്തവണ റെഡ് സ്ക്വയറിൽ പരേഡ് നടന്നത്. ഉക്രെയ്നിന്റെ ഡ്രോൺ, മിസൈൽ ആക്രമണ ഭീഷണിയെത്തുടർന്ന് കനത്ത സുരക്ഷയാണ് മോസ്കോയിൽ ഏർപ്പെടുത്തിയിരുന്നത്. നഗരത്തിലുടനീളം ഇന്റർനെറ്റ് സേവനങ്ങൾ വിച്ഛേദിച്ചു. സാധാരണ കാണാറുള്ള മിസൈലുകളുടെയും കവചിത വാഹനങ്ങളുടെയും പ്രദർശനം ഇത്തവണ ഉണ്ടായിരുന്നില്ല. പകരം റഷ്യയുടെ ആണവശേഷിയും ഡ്രോൺ കരുത്തും വ്യക്തമാക്കുന്ന വീഡിയോ ദൃശ്യങ്ങളാണ് അതിഥികൾക്കായി പ്രദർശിപ്പിച്ചത്.
ബെലാറസ്, കസാക്കിസ്ഥാൻ, ഉസ്ബെക്കിസ്ഥാൻ എന്നീ രാജ്യങ്ങളിൽ നിന്നുള്ള നേതാക്കൾ പരേഡിൽ പങ്കെടുത്തു. റഷ്യയുടെ അടുത്ത സഖ്യകക്ഷിയായി മാറിയ വടക്കൻ കൊറിയയിൽ നിന്നുള്ള സൈനികരുടെ സാന്നിധ്യം ഇത്തവണത്തെ പരേഡിലെ ശ്രദ്ധേയമായ കാഴ്ചയായിരുന്നു. ഏകദേശം 45 മിനിറ്റ് മാത്രമാണ് പരേഡ് നീണ്ടുനിന്നത്.
വിക്ടറി ഡേയോടനുബന്ധിച്ച് റഷ്യയും ഉക്രെയ്നും മൂന്ന് ദിവസത്തെ വെടിനിർത്തലിനും തടവുകാരെ കൈമാറുന്നതിനും ധാരണയായതായി യുഎസ് പ്രസിഡന്റ് ഡൊണാൾഡ് ട്രംപ് അറിയിച്ചിരുന്നു. മെയ് 11 വരെയാണ് ഈ വെടിനിർത്തൽ പ്രാബല്യത്തിലുള്ളത്. പരേഡ് തടസ്സപ്പെടുത്താൻ തങ്ങൾ ഉദ്ദേശിക്കുന്നില്ലെന്ന് ഉക്രെയ്ൻ പ്രസിഡന്റ് വ്ളാഡിമിർ സെലൻസ്കിയും വ്യക്തമാക്കിയിരുന്നു.
യുദ്ധം നീണ്ടുപോകുന്നതിലും ഇന്റർനെറ്റ് നിരോധനം പോലുള്ള നിയന്ത്രണങ്ങളിലും റഷ്യൻ പൊതുസമൂഹത്തിൽ പ്രതിഷേധം നിലനിൽക്കുന്ന സാഹചര്യത്തിലാണ് ഇത്തവണത്തെ ആഘോഷങ്ങൾ നടന്നത്. രണ്ടാം ലോകമഹായുദ്ധത്തിലെ വെറ്ററൻ സൈനികർക്ക് പകരം ഉക്രെയ്നിൽ പോരാടുന്ന സൈനികർക്കൊപ്പമാണ് പുടിൻ ഇത്തവണ വേദി പങ്കിട്ടത്
