വയനാട് മുണ്ടക്കൈ-ചൂരൽമല ഉരുൾപൊട്ടൽ ദുരന്തത്തിൽ വീട് നഷ്ടമായ 178 കുടുംബങ്ങളെ ജൂൺ മാസത്തോടെ കൽപറ്റയിലെ പുതിയ ടൗൺഷിപ്പിലേക്ക് മാറ്റിപ്പാർപ്പിക്കാനൊരുങ്ങുന്നു. എൽസ്റ്റൺ എസ്റ്റേറ്റിൽ സംസ്ഥാന സർക്കാർ നിർമിച്ച മോഡൽ ടൗൺഷിപ്പിലെ ആദ്യഘട്ട വീടുകളുടെ നിർമാണം പൂർത്തിയാകുന്ന സാഹചര്യത്തിലാണ് പുനരധിവാസ നടപടികൾ വേഗത്തിലാക്കുന്നത്.
ആദ്യഘട്ടത്തിൽ 178 വീടുകളാണ് ഗുണഭോക്താക്കൾക്ക് കൈമാറുന്നത്. മുണ്ടക്കൈ-ചൂരൽമല ദുരന്തത്തിൽ വീടും സ്ഥലവും പൂർണമായി നഷ്ടമായ കുടുംബങ്ങൾക്കാണ് മുൻഗണന നൽകിയിരിക്കുന്നത്. ഓരോ വീടും ഏഴ് സെന്റ് സ്ഥലത്തായി ഏകദേശം 1000 ചതുരശ്ര അടി വിസ്തീർണമുള്ളതാണ്. മൂന്ന് ബെഡ്റൂം, ഹാൾ, അടുക്കള, പഠനമുറി, സ്റ്റോർ റൂം എന്നിവ ഉൾപ്പെടുന്ന രീതിയിലാണ് വീടുകളുടെ രൂപകൽപന.
കൽപറ്റ ബൈപാസിനോട് ചേർന്നുള്ള ടൗൺഷിപ്പിൽ കുടിവെള്ളം, വൈദ്യുതി, ആന്തരിക റോഡുകൾ, മാലിന്യ സംസ്കരണ സംവിധാനം, കമ്മ്യൂണിറ്റി സെന്റർ, അങ്കണവാടി, പൊതുമാർക്കറ്റ്, കുട്ടികളുടെ കളിസ്ഥലം തുടങ്ങിയ അടിസ്ഥാന സൗകര്യങ്ങളും ഒരുക്കുന്നുണ്ട്. ദുരന്തപ്രതിരോധ ശേഷി മുൻനിർത്തിയാണ് നിർമാണ പ്രവർത്തനങ്ങൾ പൂർത്തിയാക്കിയതെന്ന് അധികൃതർ അറിയിച്ചു.
ടൗൺഷിപ്പിലെ വീടുകളുടെ നറുക്കെടുപ്പ് നടപടികൾ നേരത്തെ പൂർത്തിയായിരുന്നു. ഗുണഭോക്താക്കൾക്ക് വീടുകളുടെയും സ്ഥലത്തിന്റെയും പട്ടയരേഖകളും കൈമാറിയിട്ടുണ്ട്. ശേഷിക്കുന്ന വീടുകളുടെ നിർമാണവും പുരോഗമിക്കുകയാണെന്നും മുഴുവൻ കുടുംബങ്ങളെയും ഘട്ടംഘട്ടമായി പുനരധിവസിപ്പിക്കുമെന്നും സർക്കാർ അറിയിച്ചു.
