റിയാദ്: സൗദി അറേബ്യയുടെ തലസ്ഥാനമായ റിയാദിൽ ശനിയാഴ്ച പുലർച്ചെ ശക്തമായ സ്ഫോടന ശബ്ദങ്ങൾ കേട്ടതായി വാർത്താ ഏജൻസികൾ റിപ്പോർട്ട് ചെയ്തു. ഇതിന് മുന്നോടിയായി റിയാദ് ഉൾപ്പെടെ പ്രദേശങ്ങളിൽ സൗദി സിവിൽ ഡിഫൻസ് വ്യോമാക്രമണ ഭീഷണി സംബന്ധിച്ച മുന്നറിയിപ്പ് നൽകിയിരുന്നു.
പ്രാദേശിക സമയം പുലർച്ചെ മൂന്നോടെ മൊബൈൽ ഫോണുകളിലേക്ക് മുന്നറിയിപ്പ് സന്ദേശം ലഭിച്ചതായാണ് റിപ്പോർട്ട്. സുരക്ഷാ മുൻകരുതലിന്റെ ഭാഗമായി ആളുകളോട് വീടുകൾക്കുള്ളിൽ തുടരാനും തുറസ്സായ സ്ഥലങ്ങളിൽനിന്നും ജനലുകൾ, ബാൽക്കണി തുടങ്ങിയവയിൽനിന്നും മാറിനിൽക്കാനും അധികൃതർ നിർദേശിച്ചു. തുടർന്ന് റിയാദിൽ സ്ഫോടന ശബ്ദങ്ങൾ കേട്ടു.
ഏകദേശം അരമണിക്കൂറിനുശേഷം അപകടസാധ്യത അവസാനിച്ചതായി സൗദി സിവിൽ ഡിഫൻസ് അറിയിക്കുകയും ജാഗ്രതാ നിർദേശം പിൻവലിക്കുകയും ചെയ്തു. റിയാദിനൊപ്പം തലസ്ഥാനത്തിന് കിഴക്കുള്ള അൽ-ഖർജ് മേഖലയിലും മുന്നറിയിപ്പ് നൽകിയിരുന്നു.
അതേസമയം, റിയാദിലെ കിങ് ഖാലിദ് അന്താരാഷ്ട്ര വിമാനത്താവളത്തിന് സമീപം കറുത്ത പുക ഉയരുന്നതായി റോയിട്ടേഴ്സ് ചിത്രങ്ങൾ പുറത്തുവിട്ടു. എന്നാൽ സ്ഫോടനത്തിന്റെ കൃത്യമായ കാരണം സംബന്ധിച്ച് സൗദി അധികൃതർ ഔദ്യോഗിക വിശദീകരണം നൽകിയിട്ടില്ല. സ്ഫോടനത്തിൽ ആളപായമോ നാശനഷ്ടമോ ഉണ്ടായതായി ഔദ്യോഗികമായി റിപ്പോർട്ട് ചെയ്തിട്ടില്ല.
യെമനിലെ ഹൂതി വിഭാഗം സൗദിക്കെതിരെ ആക്രമണങ്ങൾ ശക്തമാക്കിയ സാഹചര്യത്തിലാണ് റിയാദിൽ പുതിയ സുരക്ഷാ മുന്നറിയിപ്പ് ഉണ്ടായത്. സ്ഫോടനത്തിന് ഹൂതി ആക്രമണവുമായി ബന്ധമുണ്ടെന്ന സംശയങ്ങൾ ഉയർന്നിട്ടുണ്ടെങ്കിലും, അതിന്റെ കാരണം സൗദി അധികൃതർ സ്ഥിരീകരിച്ചിട്ടില്ല.
