തിരുവനന്തപുരം: സംസ്ഥാനത്തെ സ്കൂളുകളിൽ വേനലവധി കാലത്ത് പ്രത്യേക ക്ലാസുകൾ (Special Classes) നടത്തുന്നത് അനുവദിക്കില്ലെന്ന് വിദ്യാഭ്യാസ മന്ത്രി വി. ശിവൻകുട്ടി. കനത്ത ചൂട് തുടരുന്ന സാഹചര്യത്തിൽ കുട്ടികളുടെ ആരോഗ്യം കണക്കിലെടുത്താണ് ഈ തീരുമാനമെന്ന് മന്ത്രി വ്യക്തമാക്കി.പൊതുവിദ്യാഭ്യാസ വകുപ്പിന്റെ നിർദ്ദേശം ലംഘിച്ച് അവധിക്കാലത്ത് ക്ലാസുകൾ നടത്തുന്ന സ്കൂളുകൾക്കെതിരെ കർശന നടപടിയുണ്ടാകും. പ്രൈമറി തലം മുതൽ ഹയർ സെക്കൻഡറി തലം വരെയുള്ള ക്ലാസുകൾക്ക് ഇത് ബാധകമാണ്.
സംസ്ഥാനത്ത് താപനില ക്രമാതീതമായി ഉയരുന്നതിനാൽ കുട്ടികൾക്ക് ശാരീരിക ബുദ്ധിമുട്ടുകൾ ഉണ്ടാകാൻ സാധ്യതയുണ്ട്. ദുരന്തനിവാരണ അതോറിറ്റിയുടെയും ആരോഗ്യ വകുപ്പിന്റെയും ജാഗ്രതാ നിർദ്ദേശങ്ങൾ കൂടി പരിഗണിച്ചാണ് ഈ തീരുമാനം.വേനലവധിക്ക് ചില സ്കൂളുകൾ ക്ലാസുകൾ സംഘടിപ്പിക്കുന്നതായി സർക്കാരിന്റെ ശ്രദ്ധയിൽപ്പെട്ടിട്ടുണ്ട്. ഇത്തരം നീക്കങ്ങളിൽ നിന്ന് സ്കൂൾ മാനേജ്മെന്റുകൾ പിന്മാറണമെന്ന് മന്ത്രി നിർദ്ദേശിച്ചു.
അവധിക്കാലം കുട്ടികൾക്ക് വിശ്രമിക്കാനും മാനസിക ഉല്ലാസത്തിനുമുള്ള സമയമാണെന്നും അത് ക്ലാസുകളിലൂടെ നഷ്ടപ്പെടുത്തരുതെന്നും അദ്ദേഹം കൂട്ടിച്ചേർത്തു.അപ്രതീക്ഷിതമായി ഉയരുന്ന ചൂട് കണക്കിലെടുത്ത് സംസ്ഥാനത്തെ വിദ്യാഭ്യാസ സ്ഥാപനങ്ങൾ സർക്കാർ പുറപ്പെടുവിച്ച ഈ ചട്ടം കൃത്യമായി പാലിക്കണമെന്നും മന്ത്രി അറിയിച്ചു.
