കീവ്: റഷ്യയുടെ സമാര മേഖലയിൽ പ്രവർത്തിക്കുന്ന റോക്കറ്റ് നിർമാണകേന്ദ്രത്തിൽ യുക്രെയ്ൻ മിസൈൽ ആക്രമണം നടത്തിയതായി റിപ്പോർട്ട്. റഷ്യ വികസിപ്പിക്കുന്ന ഉപഗ്രഹ അധിഷ്ഠിത ഇന്റർനെറ്റ് സംവിധാനമായ ‘റാസ്വെറ്റ്’ പദ്ധതിക്കായി ഉപയോഗിക്കുന്ന റോക്കറ്റുകൾ നിർമിക്കുന്ന പ്രോഗ്രസ് റോക്കറ്റ് ആൻഡ് സ്പേസ് സെന്ററാണ് ആക്രമിക്കപ്പെട്ടതെന്ന് യുക്രെയ്ൻ അവകാശപ്പെട്ടു.
യുക്രെയ്ൻ അതിർത്തിയിൽ നിന്ന് ഏകദേശം 900 കിലോമീറ്റർ അകലെയാണ് സമാര. യുക്രെയ്ൻ പ്രസിഡന്റ് വൊളൊഡിമിർ സെലെൻസ്കിയുടെ വാക്കുകൾ പ്രകാരം, രാജ്യത്ത് വികസിപ്പിച്ച ഫ്ലമിംഗോ മിസൈലുകളാണ് ആക്രമണത്തിന് ഉപയോഗിച്ചത്. റോക്കറ്റ് നിർമാണകേന്ദ്രത്തിൽ മിസൈൽ പതിച്ചതായി റഷ്യൻ സൈന്യവും സ്ഥിരീകരിച്ചതായി റിപ്പോർട്ടിൽ പറയുന്നു.
അതേസമയം, സമാര മേഖലയിലെ വൻ മിസൈൽ ആക്രമണം വ്യോമപ്രതിരോധ സംവിധാനം ഉപയോഗിച്ച് പരാജയപ്പെടുത്തിയെന്നാണ് റഷ്യൻ അധികൃതരുടെ വിശദീകരണം. ആക്രമണത്തിൽ ഉണ്ടായ നാശനഷ്ടങ്ങളുടെയോ ആളപായത്തിന്റെയോ വിശദമായ കണക്ക് ഇരുപക്ഷവും പുറത്തുവിട്ടിട്ടില്ല.
അമേരിക്കൻ കമ്പനിയായ സ്പേസ്എക്സിന്റെ സ്റ്റാർലിങ്കിന് സമാനമായ ഉപഗ്രഹ ഇന്റർനെറ്റ് ശൃംഖലയാണ് റഷ്യ ‘റാസ്വെറ്റ്’ എന്ന പേരിൽ വികസിപ്പിക്കുന്നത്. ഇതിന്റെ ഉപഗ്രഹങ്ങൾ വിക്ഷേപിക്കാൻ ആവശ്യമായ റോക്കറ്റുകൾ നിർമിക്കുന്ന പ്രധാന കേന്ദ്രങ്ങളിലൊന്നാണ് സമാരയിലെ പ്രോഗ്രസ് കേന്ദ്രം. റഷ്യയിലെ നിഷ്നി നൊവ്ഗൊറോദിലുള്ള ഒരു സൈനിക വ്യോമതാവളത്തിലും മിസൈൽ ആക്രമണം നടത്തിയതായി യുക്രെയ്ൻ അവകാശപ്പെട്ടിട്ടുണ്ട്.
യുക്രെയ്ൻ ദൂരപരിധിയേറിയ മിസൈൽ ആക്രമണശേഷി വർധിപ്പിക്കുന്നതിനിടെയാണ് റഷ്യയുടെ സൈനിക-വ്യവസായ അടിസ്ഥാന സൗകര്യങ്ങളെ ലക്ഷ്യമിട്ടുള്ള പുതിയ ആക്രമണം. ആക്രമണത്തിന്റെ കൃത്യമായ നാശനഷ്ടങ്ങൾ സ്വതന്ത്രമായി സ്ഥിരീകരിക്കപ്പെട്ടിട്ടില്ല.
