ന്യൂഡൽഹി: ആഗോളതലത്തിൽ ഇന്ന് അന്താരാഷ്ട്ര പ്രകാശ ദിനമായി (International Day of Light) ആചരിക്കുന്നു. ശാസ്ത്രജ്ഞനും എഞ്ചിനീയറുമായിരുന്ന തിയോഡോർ മൈമാൻ 1960 മേയ് 16-ന് ചരിത്രത്തിലാദ്യമായി ലേസർ വിജയകരമായി പ്രവർത്തിപ്പിച്ചതിന്റെ ഓർമ്മ പുതുക്കിയാണ് എല്ലാ വർഷവും മേയ് 16 പ്രകാശ ദിനമായി ആചരിച്ചുപോരുന്നത്.
“സുസ്ഥിരമായ ഭാവിക്കായി പ്രകാശം” (Light for a Sustainable Future) എന്നതാണ് ഈ വർഷത്തെ ദിനാചരണത്തിന്റെ സന്ദേശം. ഊർജ്ജക്ഷമതയുള്ള ലൈറ്റിംഗ് സംവിധാനങ്ങൾ, ഹരിത ഉൽപ്പാദന രീതികൾ, മെച്ചപ്പെട്ട കാർഷിക രീതികൾ എന്നിവയിലൂടെ പ്രകാശാധിഷ്ഠിത സാങ്കേതികവിദ്യകൾ എങ്ങനെ സുസ്ഥിര വികസനത്തിന് സംഭാവന നൽകുന്നു എന്നതിലൂന്നിയാണ് ഈ വർഷത്തെ പ്രവർത്തനങ്ങൾ.
പ്രകാശത്തെക്കുറിച്ചുള്ള പഠനങ്ങളും സാങ്കേതിക മുന്നേറ്റങ്ങളും ബദൽ ഊർജ്ജ സ്രോതസ്സുകളുടെ വികസനം, ജീവൻ രക്ഷാ മെഡിക്കൽ രോഗനിർണ്ണയ ഉപാധികൾ, അതിവേഗ ആശയവിനിമയ സംവിധാനങ്ങൾ എന്നിവയ്ക്ക് വഴിതുറന്നിട്ടുണ്ട്. സമൂഹത്തിൽ വലിയ മാറ്റങ്ങൾ സൃഷ്ടിച്ച ഇത്തരം കണ്ടെത്തലുകളുടെ പ്രാധാന്യം ജനങ്ങളിലെത്തിക്കാനാണ് ഈ ദിവസം വിനിയോഗിക്കുന്നത്. ദിനാചരണത്തിന്റെ ഭാഗമായി ശാസ്ത്രീയ സഹകരണം ശക്തിപ്പെടുത്താനും സമാധാനത്തിനും സുസ്ഥിര വികസനത്തിനുമായി പ്രകാശത്തിന്റെ ശക്തി പ്രയോജനപ്പെടുത്താനും യുനെസ്കോ ആഹ്വാനം ചെയ്തു.
