സിഡ്നി: 16 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ പൂർണ്ണമായും നിരോധിച്ച അൽബാനീസ് സർക്കാരിന്റെ നടപടിയെ പരസ്യമായി വിമർശിച്ച് ഓസ്ട്രേലിയൻ ഇ-സേഫ്റ്റി കമ്മീഷണർ ജൂലി ഇൻമാൻ ഗ്രാന്റ് രംഗത്ത്. കുട്ടികൾക്ക് ഏർപ്പെടുത്തിയ ഈ കൂട്ട നിരോധനത്തോട് തനിക്ക് വ്യക്തിപരമായി താല്പര്യമില്ലെന്നും, വളരെ ധൃതിപിടിച്ചാണ് ഈ നിയമം നിർമ്മിച്ചതെന്നും അവർ വ്യക്തമാക്കി.
സർക്കാർ നടപടിയെ കടലിന് വേലി കെട്ടുന്നതിനോടാണ് കമ്മീഷണർ ഉപമിച്ചത്. “കുട്ടികൾക്ക് സോഷ്യൽ മീഡിയയിൽ ഒരു പരിധിവരെ സുരക്ഷിതത്വം ഒരുക്കാൻ നമുക്ക് കഴിഞ്ഞേക്കും, എന്നാൽ കടലൊഴുക്ക് പൂർണ്ണമായി തടയാൻ കഴിയുമെന്ന് കരുതുന്നത് വ്യർത്ഥമാണ്,” സിഡ്നി മോർണിംഗ് ഹെറാൾഡിന് നൽകിയ അഭിമുഖത്തിൽ അവർ പറഞ്ഞു. ഈ നിരോധനം പ്രായോഗികമല്ലാത്ത ഒരു കർശന നടപടിയാണെന്നും (Blunt-force approach) അവർ കൂട്ടിച്ചേർത്തു. 2025 ഡിസംബറിൽ നിലവിൽ വന്ന ഈ നിയമം വഴി പ്രായപൂർത്തിയാകാത്ത കുട്ടികളുടെ അഞ്ച് മില്യണിലധികം അക്കൗണ്ടുകളാണ് ബ്ലോക്ക് ചെയ്തത്. എന്നാൽ, ഇ-സേഫ്റ്റി കമ്മീഷന്റെ തന്നെ കണക്കുകൾ പ്രകാരം ഇപ്പോഴും 70 ശതമാനത്തോളം കുട്ടികൾ ടിക്ടോക്, ഇൻസ്റ്റാഗ്രാം, യൂട്യൂബ് തുടങ്ങിയ പ്ലാറ്റ്ഫോമുകൾ വ്യാജ മാർഗ്ഗങ്ങളിലൂടെ ഉപയോഗിക്കുന്നുണ്ട്. നിയമം ലംഘിക്കുന്ന സോഷ്യൽ മീഡിയ കമ്പനികൾക്ക് 50 മില്യൺ ഓസ്ട്രേലിയൻ ഡോളർ വരെ പിഴ ചുമത്താൻ വ്യവസ്ഥയുണ്ട്.
അതിനിടെ, കഴിഞ്ഞ മാർച്ചിൽ അൽബാനീസ് സർക്കാർ ഈ നിയമം കൂടുതൽ കർശനമാക്കിയിരുന്നു. ഉപഭോക്താക്കളെ ആകർഷിച്ചു നിർത്താൻ അൽഗോരിതം ഉപയോഗിക്കുന്നതും, ഇൻഫിനിറ്റ് സ്ക്രോളിംഗ്, ലൈക്കുകൾ, 24 മണിക്കൂർ നീളുന്ന സ്റ്റോറികൾ തുടങ്ങിയ ‘ഡോപമിൻ ഉത്തേജിപ്പിക്കുന്ന’ സവിശേഷതകൾ ഉള്ളതുമായ എല്ലാ ആപ്പുകളും നിരോധനത്തിന്റെ പരിധിയിൽ വരും. ഫേസ്ബുക്ക്, ഇൻസ്റ്റാഗ്രാം, ടിക്ടോക്, റെഡ്ഡിറ്റ് ഉൾപ്പെടെ പത്ത് പ്രമുഖ പ്ലാറ്റ്ഫോമുകൾ ഈ കർശന പരിധിയിൽ വരുമെന്ന് ഇ-സേഫ്റ്റി കമ്മീഷണർ സ്ഥിരീകരിച്ചു. അതേസമയം ഡിസ്കോർഡ്, വാട്സ്ആപ്പ്, ഗൂഗിൾ ക്ലാസ്റൂം, റോബ്ലോക്സ് എന്നിവയെ നിലവിൽ ഇതിൽ നിന്നും ഒഴിവാക്കിയിട്ടുണ്ട്.
ഈ നിയമത്തിനെതിരെ റെഡ്ഡിറ്റും രണ്ട് കൗമാരക്കാരും ‘ഡിജിറ്റൽ ഫ്രീഡം പ്രൊജക്റ്റ്’ എന്ന സംഘടനയുടെ പിന്തുണയോടെ ഹൈക്കോടതിയെ സമീപിച്ചിരിക്കുകയാണ്. നിയമം ഭരണഘടനാ വിരുദ്ധമാണെന്നും യുവാക്കളുടെ അവകാശങ്ങളെ ഹനിക്കുന്നതാണെന്നുമാണ് ഇവരുടെ വാദം. കോടതിയിൽ കേസ് വരാനിരിക്കെയാണ് സർക്കാരിനെ പ്രതിരോധത്തിലാക്കി ഇ-സേഫ്റ്റി കമ്മീഷണറുടെ പ്രസ്താവന പുറത്തുവന്നിരിക്കുന്നത്. എന്നാൽ, കുട്ടികൾക്ക് അവരുടെ കുട്ടിക്കാലം തിരികെ നൽകാനും മാതാപിതാക്കളുടെ ആശങ്കയകറ്റാനുമാണ് ഈ നിയമമെന്നും, ഓസ്ട്രേലിയയുടെ ഈ മാതൃക ലോകമെമ്പാടും പ്രശംസിക്കപ്പെടുന്നുണ്ടെന്നും പ്രധാനമന്ത്രി ആന്റണി അൽബാനീസ് ആവർത്തിച്ചു വ്യക്തമാക്കി
