മെൽബൺ: മെൽബണിന്റെ പടിഞ്ഞാറൻ മേഖലയിലുണ്ടായ അതിരൂക്ഷമായ സംഘർഷത്തിൽ ഒരാൾക്ക് ഗുരുതരമായി പരിക്കേറ്റു. ഏകദേശം 17 പേരടങ്ങുന്ന സംഘം വാളുകളും ബാറ്റുകളും ഉപയോഗിച്ച് ഏറ്റുമുട്ടുകയും വെടിയുതിർക്കുകയും ചെയ്ത സംഭവത്തിൽ പോലീസ് അന്വേഷണം ഊർജിതമാക്കി.
ഒക്ടോബർ നാല് ഞായറാഴ്ച പുലർച്ചെ ടാർണീറ്റിലെ ഡ്രൂമർ വേയിലായിരുന്നു സംഭവം. ഇന്ത്യൻ ഉപഭൂഖണ്ഡത്തിൽ നിന്നുള്ളവരുടെ രൂപസാദൃശ്യമുള്ള സംഘമാണ് അക്രമത്തിന് പിന്നിലെന്ന് വിൻഡ്ഹാം ക്രൈം ഇൻവെസ്റ്റിഗേഷൻ യൂണിറ്റ് ഡിറ്റക്ടീവുകൾ വ്യക്തമാക്കി. പുലർച്ചെ 4.10-ഓടെ 15-നും 20-നും ഇടയിൽ ആളുകൾ ഏറ്റുമുട്ടുന്നതായും ഒന്നിലധികം തവണ വെടിയൊച്ച കേട്ടതായും ദൃക്സാക്ഷി അറിയിച്ചതിനെ തുടർന്നാണ് പോലീസ് സ്ഥലത്തെത്തിയത്.
പോലീസ് എത്തുമ്പോഴേക്കും അക്രമികൾ രക്ഷപ്പെട്ടിരുന്നു. സ്ഥലത്ത് നടത്തിയ പരിശോധനയിൽ പലതവണ കൂട്ടിയിടിച്ച നിലയിലുള്ള രണ്ട് വാഹനങ്ങളും വിവിധ ആയുധങ്ങളും രക്തപ്പാടുകളും അന്വേഷണ ഉദ്യോഗസ്ഥർ കണ്ടെത്തി. തുടർന്ന് പുലർച്ചെ 4.39-ഓടെ ഗുരുതരമായ പരിക്കുകളോടെ 23 വയസ്സുള്ള ടാർണീറ്റ് സ്വദേശി വെറിബീ (Werribee) ആശുപത്രിയിൽ ചികിത്സ തേടി. ഇയാൾ പിന്നീട് ആശുപത്രി വിടുകയും വീട്ടിൽ വിശ്രമിക്കുകയുമാണ്. ശരീരത്തിന്റെ മുകൾഭാഗത്ത് ഗുരുതരമായ പരിക്കുകളോടെ 43 വയസ്സുള്ള മറ്റൊരു ടാർണീറ്റ് സ്വദേശിയും ആശുപത്രിയിൽ ചികിത്സ തേടിയിരുന്നു.
സംഭവവുമായി ബന്ധപ്പെട്ട് ടാർണീറ്റ്, ട്രുഗാനിന എന്നിവിടങ്ങളിൽ നിന്നുള്ള 22-നും 43-നും ഇടയിൽ പ്രായമുള്ള ആറ് പേരെ പോലീസ് അറസ്റ്റ് ചെയ്തിരുന്നു. തുടരന്വേഷണത്തിന് വിധേയമായി ഇവരെ പിന്നീട് വിട്ടയച്ചു. പുലർച്ചെ ഒരു മണിയോടെ ഡ്രൂമർ വേയുടെ വടക്കേ അറ്റത്ത് ഏകദേശം ഏഴ് വാഹനങ്ങളും 17 പേരും ഒത്തുകൂടുന്നതിന്റെ സിസിടിവി ദൃശ്യങ്ങൾ ഡിറ്റക്ടീവുകൾ പുറത്തുവിട്ടിട്ടുണ്ട്. ബേസ്ബോൾ ബാറ്റുകൾ, ക്രിക്കറ്റ് ബാറ്റുകൾ, വാളുകൾ എന്നിവയുമായാണ് സംഘം എത്തിയത്. സംഘർഷത്തിനിടെ ഷോട്ട്ഗണ്ണിൽ നിന്ന് വെടിയുതിർത്തതായാണ് അന്വേഷണ ഉദ്യോഗസ്ഥർ സംശയിക്കുന്നത്.
കേസുമായി ബന്ധപ്പെട്ട് ‘0008OG’ എന്ന രജിസ്ട്രേഷൻ നമ്പറുള്ള കറുത്ത 2021 ഫോർഡ് റേഞ്ചർ റാപ്റ്റർ യൂട്ട്, ‘TJR447’ എന്ന രജിസ്ട്രേഷൻ നമ്പറുള്ള ചുവന്ന 1998 നിസ്സാൻ പട്രോൾ എന്നീ രണ്ട് വാഹനങ്ങളെക്കുറിച്ചുള്ള വിവരങ്ങൾക്കായി പോലീസ് തിരച്ചിൽ തുടരുകയാണ്. സംഭവത്തിന് ദൃക്സാക്ഷികളായവരോ സിസിടിവി, ഡാഷ്ക്യാം ദൃശ്യങ്ങൾ കൈവശമുള്ളവരോ ‘1800 333 000’ എന്ന നമ്പറിൽ ക്രൈം സ്റ്റോപ്പേഴ്സുമായി ബന്ധപ്പെടണമെന്ന് വിക്ടോറിയ പോലീസ് അഭ്യർത്ഥിച്ചു.

