പെർത്ത്: ഓസ്ട്രേലിയയിലെ ഏറ്റവും നിഗൂഢമായ നഗരങ്ങളിലൊന്നായി അറിയപ്പെടുന്ന വെസ്റ്റേൺ ഓസ്ട്രേലിയയിലെ യൂസ്ലെസ് ലൂപ്പ് (Useless Loop) വാർത്തകളിൽ നിറയുന്നു. കേവലം 134 പേർ മാത്രം താമസിക്കുന്ന ഈ കൊച്ചു നഗരം ഷാർക്ക് ബേ മേഖലയിലാണ് സ്ഥിതി ചെയ്യുന്നത്. ജാപ്പനീസ് കമ്പനിയായ മിത്സുയിയുടെ കീഴിലുള്ള ഷാർക്ക് ബേ സാൾട്ട് മൈനിന്റെ ഭാഗമായാണ് ഈ നഗരം പ്രവർത്തിക്കുന്നത്.
ഖനിയിലെ തൊഴിലാളികൾക്കും അവരുടെ കുടുംബങ്ങൾക്കും താമസിക്കാനായി മാത്രം നിർമ്മിക്കപ്പെട്ട ഈ നഗരം ഒരു ‘ക്ലോസ്ഡ് കമ്മ്യൂണിറ്റി’ (Closed Community) ആയാണ് പരിഗണിക്കപ്പെടുന്നത്. അതായത്, ഖനി അധികൃതരുടെ മുൻകൂട്ടിയുള്ള അനുവാദമില്ലാതെ പുറത്തുനിന്നുള്ള ഒരാൾക്കും ഇവിടേക്ക് പ്രവേശിക്കാൻ സാധിക്കില്ല. നഗരത്തിന്റെ രഹസ്യാത്മകത എത്രത്തോളമുണ്ടെന്നാൽ ഗൂഗിൾ എർത്തിലെ സ്ട്രീറ്റ് വ്യൂ ഫീച്ചറിൽ പോലും ഈ നഗരത്തിന്റെ ദൃശ്യങ്ങൾ ലഭ്യമല്ല.
വർഷം തോറും നാല് ദശലക്ഷം ടണ്ണിലധികം ഉപ്പ് ഇവിടെ നിന്ന് ജപ്പാൻ ഉൾപ്പെടെയുള്ള ഏഷ്യൻ രാജ്യങ്ങളിലേക്ക് കയറ്റുമതി ചെയ്യുന്നുണ്ട്. വളരെ കുറഞ്ഞ ജനസംഖ്യയാണെങ്കിലും ഒരു പ്രൈമറി സ്കൂളും കടകളും പ്രദേശവാസികൾക്കിടയിൽ ഏറെ പ്രശസ്തമായ ഒരു ടാവേണും (Tavern) ഇവിടെ പ്രവർത്തിക്കുന്നുണ്ട്. ടിക് ടോക് വീഡിയോകളിലൂടെയും മറ്റും ഈ രഹസ്യ നഗരത്തെക്കുറിച്ചുള്ള വിവരങ്ങൾ പുറത്തുവന്നതോടെയാണ് ലോകം ഇവിടത്തെ പ്രത്യേകതകളെക്കുറിച്ച് അറിഞ്ഞു തുടങ്ങിയത്. സ്കൂൾ അധികൃതർ വഴി നഗരത്തിലെ ജീവിതത്തെക്കുറിച്ച് കൂടുതൽ വിവരങ്ങൾ ശേഖരിക്കാനുള്ള ശ്രമത്തിലാണ് മാധ്യമപ്രവർത്തകർ.
