ലണ്ടൻ: ഇന്ത്യൻ മഹാസമുദ്രത്തിലെ തന്ത്രപ്രധാനമായ ചാഗോസ് ദ്വീപസമൂഹത്തിന്റെ പരമാധികാരം മൗറീഷ്യസിന് കൈമാറാനുള്ള കരാറിൽ നിന്ന് ബ്രിട്ടൻ താൽക്കാലികമായി പിന്മാറുന്നു. അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഭരണകൂടം ഈ കരാറിനോട് കടുത്ത വിയോജിപ്പ് പ്രകടിപ്പിച്ചതിനെത്തുടർന്നാണ് ബ്രിട്ടീഷ് സർക്കാരിന്റെ ഈ നാടകീയ നീക്കം.
ചാഗോസ് ദ്വീപസമൂഹം മൗറീഷ്യസിന് വിട്ടുനൽകുന്നത് മേഖലയിലെ സുരക്ഷയെ ബാധിക്കുമെന്നും ചൈനയ്ക്ക് അവിടെ സ്വാധീനം ഉറപ്പിക്കാൻ ഇത് അവസരമൊരുക്കുമെന്നുമാണ് ട്രംപ് ഭരണകൂടത്തിന്റെ നിലപാട്. ഇക്കാര്യത്തിൽ അമേരിക്കൻ വിയോജിപ്പ് ശക്തമായതോടെ ബ്രിട്ടീഷ് പ്രധാനമന്ത്രി കീർ സ്റ്റാർമറുടെ നേതൃത്വത്തിലുള്ള സർക്കാർ കൈമാറ്റ നടപടികൾ മരവിപ്പിക്കാൻ തീരുമാനിക്കുകയായിരുന്നു.
ചാഗോസ് ദ്വീപസമൂഹത്തിലെ ഏറ്റവും വലിയ ദ്വീപായ ഡീഗോ ഗാർഷ്യയിൽ അമേരിക്കയുടെയും ബ്രിട്ടന്റെയും സംയുക്ത സൈനിക താവളം സ്ഥിതി ചെയ്യുന്നുണ്ട്. മിഡിൽ ഈസ്റ്റ്, ദക്ഷിണേഷ്യൻ മേഖലകളിൽ നിരീക്ഷണം നടത്താൻ തന്ത്രപ്രധാനമായ ഈ താവളം അത്യന്താപേക്ഷിതമാണെന്ന് അമേരിക്ക കരുതുന്നു. മൗറീഷ്യസിന് ദ്വീപ് നൽകിയാൽ ഈ താവളത്തിന്റെ സുരക്ഷ അപകടത്തിലാകുമെന്ന് അമേരിക്കൻ പ്രതിരോധ വൃത്തങ്ങൾ മുന്നറിയിപ്പ് നൽകിയിരുന്നു.
വർഷങ്ങൾ നീണ്ട നിയമപോരാട്ടങ്ങൾക്കും അന്താരാഷ്ട്ര സമ്മർദ്ദങ്ങൾക്കും ഒടുവിൽ കഴിഞ്ഞ വർഷമാണ് ദ്വീപുകൾ മൗറീഷ്യസിന് നൽകാൻ ബ്രിട്ടൻ തത്വത്തിൽ ധാരണയിലെത്തിയത്. എന്നാൽ ഡീഗോ ഗാർഷ്യയിലെ സൈനിക താവളത്തിന്റെ പ്രവർത്തനം 99 വർഷത്തേക്ക് കൂടി തുടരാൻ ഈ കരാറിൽ വ്യവസ്ഥയുണ്ടായിരുന്നു. എങ്കിലും ചൈനയുമായി അടുത്ത ബന്ധമുള്ള മൗറീഷ്യസിന് അധികാരം കൈമാറുന്നത് സുരക്ഷിതമല്ലെന്നാണ് പുതിയ യുഎസ് ഭരണകൂടത്തിന്റെ വാദം.
