ആലീസ് സ്പ്രിംഗ്സ്: നോർത്തേൺ ടെറിട്ടറിയെ നടുക്കിയ അഞ്ചുവയസ്സുകാരി കുമഞ്ജയി ലിറ്റിൽ ബേബിയുടെ മരണവുമായി ബന്ധപ്പെട്ട് പ്രതിയെന്ന് സംശയിക്കുന്ന ജെഫേഴ്സൺ ലൂയിസിനെ (47) പോലീസ് അറസ്റ്റ് ചെയ്തു. വ്യാഴാഴ്ച രാത്രി പത്ത് മണിയോടെ ആലീസ് സ്പ്രിംഗ്സിലെ ഒരു വീട്ടിൽ നിന്നാണ് ഇയാളെ പിടികൂടിയത്. അറസ്റ്റിന് തൊട്ടുമുമ്പ് നാട്ടുകാരിൽ നിന്നും ഇയാൾക്ക് പരിക്കേറ്റതായും തുടർന്ന് പോലീസ് സംരക്ഷണയിൽ ആശുപത്രിയിൽ പ്രവേശിപ്പിച്ചതായും റിപ്പോർട്ടുകളുണ്ട്.
കഴിഞ്ഞ ശനിയാഴ്ച രാത്രിയാണ് ഇൽപെരെനി (Old Timers) ടൗൺ ക്യാമ്പിൽ നിന്ന് കുട്ടിയെ കാണാതായത്. അമ്മയോടൊപ്പം ക്യാമ്പിലെത്തിയ കുട്ടി രാത്രി 11 മണിയോടെ ഉറങ്ങാൻ കിടന്നതായിരുന്നു. എന്നാൽ ഒന്നരയോടെ കുട്ടി മുറിയിലില്ലെന്ന് കണ്ടതിനെത്തുടർന്ന് അമ്മ പോലീസിനെ വിവരമറിയിക്കുകയായിരുന്നു. നൂറുകണക്കിന് വോളന്റിയർമാരും പോലീസും ഡ്രോണുകളും ഹെലികോപ്റ്ററുകളും ഉപയോഗിച്ച് അഞ്ച് ദിവസത്തോളം നടത്തിയ വിപുലമായ തിരച്ചിലിനൊടുവിൽ വ്യാഴാഴ്ച ഉച്ചയോടെയാണ് കുട്ടിയുടെ മൃതദേഹം വിജനമായ സ്ഥലത്ത് കണ്ടെത്തിയത്.
ജെഫേഴ്സൺ ലൂയിസിനെ അറസ്റ്റ് ചെയ്ത വാർത്ത പരന്നതോടെ നൂറുകണക്കിന് ആളുകൾ ഇയാൾ ചികിത്സയിൽ കഴിയുന്ന ആശുപത്രിക്ക് മുന്നിലും പോലീസ് സ്റ്റേഷൻ പരിസരത്തും തടിച്ചുകൂടി. ഗോത്രവർഗ്ഗ ആചാരപ്രകാരം കുടുംബത്തിന്റെ അഭ്യർത്ഥന മാനിച്ചാണ് കുട്ടിയെ ‘കുമഞ്ജയി ലിറ്റിൽ ബേബി’ എന്ന് അഭിസംബോധന ചെയ്യുന്നത്. തന്റെ പ്രിയപ്പെട്ട മകൾക്ക് നീതി ലഭിക്കുമെന്ന പ്രതീക്ഷയിലാണ് കുടുംബം. “നമ്മുടെ ജീവിതകാലം മുഴുവൻ നീയില്ലാതെ ജീവിക്കുക എന്നത് എത്ര പ്രയാസകരമായിരിക്കും” എന്ന് കുട്ടിയുടെ അമ്മ വികാരാധീനയായി പ്രതികരിച്ചു.
നോർത്തേൺ ടെറിട്ടറി ഒന്നടങ്കം ഈ കുരുന്നിന്റെ വേർപാടിൽ ദുഃഖത്തിലാണെന്ന് ചീഫ് മിനിസ്റ്റർ ലിയ ഫിനോക്കിയാരോ പറഞ്ഞു. ഓരോ ടെറിട്ടേറിയൻ നിവാസിയും കുട്ടി സുരക്ഷിതയായി തിരിച്ചുവരുമെന്ന പ്രതീക്ഷയിലായിരുന്നുവെന്നും എന്നാൽ അങ്ങനെയൊരു വാർത്തയല്ല തങ്ങളെ തേടിയെത്തിയതെന്നും അവർ കൂട്ടിച്ചേർത്തു. പ്രതിയെ പിടികൂടിയ സാഹചര്യത്തിൽ കൊലപാതക കുറ്റം ചുമത്തി വരും ദിവസങ്ങളിൽ കോടതിയിൽ ഹാജരാക്കും. നഗരത്തിൽ സംഘർഷാവസ്ഥ നിലനിൽക്കുന്നതിനാൽ സുരക്ഷാ സംവിധാനങ്ങൾ പോലീസ് ശക്തമാക്കിയിട്ടുണ്ട്.
