ന്യൂഡൽഹി: രാജ്യത്ത് അപ്രഖ്യാപിത അടിയന്തരാവസ്ഥയ്ക്ക് സമാനമായ സാഹചര്യമാണുള്ളതെന്ന് യൂട്യൂബറും സാമൂഹിക മാധ്യമ പ്രവർത്തകനുമായ ധ്രുവ് റാഠി. ഡൽഹിയിൽ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധത്തിൽ പങ്കെടുക്കാനിരിക്കെ തന്നെ പൊലീസ് കസ്റ്റഡിയിലെടുത്ത സംഭവത്തിൽ പ്രതികരിക്കുകയായിരുന്നു അദ്ദേഹം. മുതിർന്ന അഭിഭാഷകൻ കപിൽ സിബലുമായി കൂടിക്കാഴ്ച നടത്തിയശേഷം ഡൽഹിയിൽ നടത്തിയ വാർത്താസമ്മേളനത്തിലാണ് റാഠി പൊലീസിനും കേന്ദ്രസർക്കാരിനുമെതിരേ ആരോപണങ്ങൾ ഉന്നയിച്ചത്.
തന്നെ അറസ്റ്റ് ചെയ്യുകയോ നിയമാനുസൃതമായി കസ്റ്റഡിയിലെടുക്കുകയോ ആയിരുന്നില്ലെന്നും വീട്ടിൽനിന്ന് ബലമായി കൊണ്ടുപോകുകയായിരുന്നുവെന്നും റാഠി ആരോപിച്ചു. പുലർച്ചെ ഇരുപതോളം പേർ സാധാരണ വേഷത്തിൽ വീട്ടിൽ അതിക്രമിച്ചുകയറി തന്നെ പിടിച്ചുകൊണ്ടുപോയെന്നാണ് അദ്ദേഹത്തിന്റെ വാദം. മാതാപിതാക്കൾ വീട്ടിലുണ്ടായിരുന്ന സമയത്തായിരുന്നു സംഭവമെന്നും ചെരിപ്പിടാനോ വെള്ളം കുടിക്കാനോ പോലും അനുവദിച്ചില്ലെന്നും ഫോൺ പിടിച്ചെടുത്തെന്നും അദ്ദേഹം പറഞ്ഞു.
ഏകദേശം 20 മണിക്കൂറിലധികം കസ്റ്റഡിയിൽ കഴിഞ്ഞെന്നും അഭിഭാഷകനെയോ ഫോണിനെയോ സമീപിക്കാൻ അനുവദിച്ചില്ലെന്നും റാഠി ആരോപിച്ചു. സംഭവത്തിൽ നിയമനടപടി സ്വീകരിക്കുമെന്നും അദ്ദേഹം വ്യക്തമാക്കി.
രാജ്യത്തെ തിരഞ്ഞെടുപ്പ് കമ്മീഷൻ, കോടതികൾ, പൊലീസ് തുടങ്ങിയ സ്ഥാപനങ്ങൾ രണ്ട് വ്യക്തികളുടെ നിയന്ത്രണത്തിലായെന്ന ആരോപണവും റാഠി ഉന്നയിച്ചു. പ്രധാനമന്ത്രി നരേന്ദ്ര മോദി കഴിഞ്ഞ പത്തുവർഷത്തിനിടെ ഒരു വാർത്താസമ്മേളനം പോലും നടത്തിയിട്ടില്ലെന്നും അദ്ദേഹം വിമർശിച്ചു. രാജ്യത്ത് ജനാധിപത്യ സ്ഥാപനങ്ങളുടെ പ്രവർത്തനത്തെക്കുറിച്ചുള്ള ആശങ്കകളും അദ്ദേഹം പങ്കുവച്ചു.
അതേസമയം, റാഠിയെ മുൻകരുതൽ നടപടിയുടെ ഭാഗമായി കസ്റ്റഡിയിലെടുത്തതാണെന്നാണ് പൊലീസിന്റെ വിശദീകരണം. അനുമതിയില്ലാതെ നടത്താൻ നിശ്ചയിച്ചിരുന്ന പ്രതിഷേധത്തിൽ പങ്കെടുക്കുന്നതിൽനിന്ന് പിന്തിരിപ്പിക്കാൻ മുന്നറിയിപ്പ് നൽകിയിട്ടും അദ്ദേഹം അതുമായി മുന്നോട്ടുപോകാൻ ശ്രമിച്ചതിനെ തുടർന്നാണ് നടപടിയെടുത്തതെന്ന് പൊലീസ് വൃത്തങ്ങൾ അറിയിച്ചു. ഒക്ടോബർ 11-ന് പുലർച്ചെ മൂന്നുമണിയോടെ അദ്ദേഹത്തെ വിട്ടയച്ചതായും റിപ്പോർട്ടുകളുണ്ട്.
മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഒക്ടോബർ 10-ന് ഡൽഹിയിലെ ജന്തർ മന്തറിൽ നടത്താൻ നിശ്ചയിച്ചിരുന്ന പ്രതിഷേധത്തിന്റെ പശ്ചാത്തലത്തിലാണ് സംഭവം. വോട്ടർപട്ടികയുടെ പ്രത്യേക തീവ്ര പരിഷ്‌കരണവുമായി ബന്ധപ്പെട്ട ക്രമക്കേടുകൾ ആരോപിച്ചാണ് പ്രതിഷേധം പ്രഖ്യാപിച്ചത്.
