ഡാർവിൻ: ഓസ്ട്രേലിയയിലെ ഡാർവിൻ സെന്റ് അൽഫോൻസ സിറോ മലബാർ പള്ളിയിൽ ഇടവക മധ്യസ്ഥയായ വിശുദ്ധ അൽഫോൻസായുടെയും വിശുദ്ധ തോമാശ്ലീഹായുടെയും സംയുക്ത തിരുനാൾ ജൂലൈ 24, 25, 26 (വെള്ളി, ശനി, ഞായർ) ദിവസങ്ങളിൽ ആഘോഷിക്കും. തിരുനാളിന് മുന്നോടിയായുള്ള ഒരുക്കങ്ങൾ ജൂലൈ 15 ബുധനാഴ്ച മരിച്ചുപോയ വിശ്വാസികളെ ഓർത്ത് നടത്തുന്ന വിശുദ്ധ കുർബാനയോടും ഒപ്പിസോടും കൂടി ആരംഭിക്കും. ഒൻപത് ദിവസത്തെ തിരുനാൾ നൊവേന ജൂലൈ 16 വ്യാഴാഴ്ച തുടങ്ങും. 16 മുതൽ എല്ലാ ദിവസവും വൈകിട്ട് 5:30ന് ആരാധന, ജപമാല, കുമ്പസാരം എന്നിവയും ആറ് മണിക്ക് വിശുദ്ധ കുർബാനയും നൊവേനയും നടക്കും. ദിവസേനയുള്ള തിരുകർമ്മങ്ങൾക്ക് വിവിധ കുടുംബ യൂണിറ്റുകളും സംഘടനകളും നേതൃത്വം നൽകും.
ജൂലൈ 24 വെള്ളിയാഴ്ച നൊവേന സമാപന ദിനത്തിൽ വൈകിട്ട് അഞ്ചിന് ഡാർവിൻ രൂപതാ മെത്രാൻ ബിഷപ്പ് ചാൾസ് ഗൗച്ചി തിരുനാൾ കൊടിയേറ്റും. തുടർന്ന് വിശുദ്ധ കുർബാന, നൊവേന, ലദീഞ്ഞ് എന്നിവ ഉണ്ടായിരിക്കും. വെസ്പര ദിനമായ 25-ാം തീയതി ശനിയാഴ്ച രാവിലെ ഒൻപതിന് ജപമാലയും 9:30ന് വിശുദ്ധ കുർബാനയും നടക്കും. ഫാദർ ജോസഫ് പുല്ലാനപ്പിള്ളിൽ CMI മുഖ്യ കാർമികത്വം വഹിക്കുന്ന ചടങ്ങിൽ സെന്റ് പോൾസ് നൈറ്റ് ക്ലിപ്പ് പള്ളി വികാരി ഫാദർ ജോൺ കേലിഹർ തിരുനാൾ സന്ദേശം നൽകും.
അന്ന് വൈകിട്ട് അഞ്ചിന് നടത്തുന്ന സൺഡേ സ്കൂൾ വാർഷികവും ഇടവക ദിനാഘോഷവുമായ ‘എൻഖാനിയ (ENKHANIYA) 2026’ ഡാർവിൻ രൂപത മുൻ മെത്രാൻ ബിഷപ്പ് യൂജിൻ ഹർലി ഉദ്ഘാടനം ചെയ്യും. മൾട്ടികൾച്ചറൽ മിനിസ്റ്റർ ജിൻസൺ ചാൾസ് ചടങ്ങിൽ സന്ദേശം നൽകും. തുടർന്ന് ഇടവകാംഗങ്ങൾ ഒരുക്കുന്ന കലാവിരുന്നും, കുര്യൻ കൈനകരിയും സംഘവും അവതരിപ്പിക്കുന്ന ബൈബിൾ നാടകവും സ്നേഹവിരുന്നും ഉണ്ടായിരിക്കും.
പ്രധാന തിരുനാൾ ദിനമായ ജൂലൈ 26 ഞായറാഴ്ച രാവിലെ 8:45-ന് കുട്ടികളുടെ ദീപക്കാഴ്ചയോടെ കർമ്മങ്ങൾ ആരംഭിക്കും. ഒൻപത് മണിക്ക് മെൽബൺ സന്തോം ഗ്രോവ് ഡയറക്ടർ ഫാദർ വർഗീസ് വാവോലിയുടെ മുഖ്യ കാർമികത്വത്തിൽ ആഘോഷമായ തിരുനാൾ പാട്ട് കുർബാനയും പ്രസംഗവും നടക്കും. തുടർന്ന് തിരുനാൾ പ്രദക്ഷിണം, കാർഷിക വിഭവങ്ങളുടെ ലേലം, കൊടിയിറക്കൽ എന്നിവയോടെ ആഘോഷങ്ങൾ സമാപിക്കും. തിരുനാളിന്റെ വിജയകരമായ നടത്തിപ്പിനായി വികാരി ഫാദർ ജോൺ പുതുവ, കൈക്കാരന്മാരായ സോജൻ ജോർജ്, ഡെനെക്സ് ഡേവിഡ്, ആശാ തോമസ്, തിരുനാൾ കൺവീനർ ബിജോ തോമസ് പട്ടേരി എന്നിവരുടെ നേതൃത്വത്തിലുള്ള വിവിധ കമ്മിറ്റികൾ പ്രവർത്തിച്ചുവരുന്നു.
