സിഡ്നി: ന്യൂ സൗത്ത് വെയിൽസിൽ വർദ്ധിച്ചുവരുന്ന കത്തിക്കുത്ത് കേസുകളും മറ്റ് അക്രമസംഭവങ്ങളും നേരിടുന്നതിനായി സംസ്ഥാന സർക്കാർ പുതിയ നിയമനിർമ്മാണങ്ങൾ പ്രഖ്യാപിച്ചു. പൊതുസ്ഥലങ്ങളിൽ ജനങ്ങളുടെ സുരക്ഷ ഉറപ്പാക്കുന്നതിനും കുറ്റകൃത്യങ്ങൾ തടയുന്നതിനും പോലീസിന് കൂടുതൽ അധികാരങ്ങൾ നൽകുന്ന പരിഷ്കാരങ്ങളാണ് ഇന്ന് പ്രാബല്യത്തിൽ വരുന്നത്. ക്വീൻസ്ലാന്റിൽ വിജയകരമായി നടപ്പിലാക്കിയ ‘ജാക്ക്സ് ലോ’ മാതൃകയിൽ, വാറണ്ട് ഇല്ലാതെ തന്നെ പൊതുസ്ഥലങ്ങളിൽ ആളുകളെ പരിശോധിക്കാൻ പോലീസിന് അധികാരം നൽകുന്ന നിയമം എൻ.എസ്.ഡബ്ല്യു-വിലും കർശനമാക്കുന്നു. ഷോപ്പിംഗ് സെന്ററുകൾ, റെയിൽവേ സ്റ്റേഷനുകൾ, മറ്റ് പൊതുഗതാഗത കേന്ദ്രങ്ങൾ എന്നിവിടങ്ങളിൽ പോലീസിന് മെറ്റൽ ഡിറ്റക്ടറുകൾ ഉപയോഗിച്ച് ഇനി പരിശോധന നടത്താം.
ഇതോടൊപ്പം കത്തികളുടെ വിൽപനയിലും സർക്കാർ കടുത്ത നിയന്ത്രണങ്ങൾ ഏർപ്പെടുത്തിയിട്ടുണ്ട്. പതിനെട്ട് വയസ്സിൽ താഴെയുള്ളവർക്ക് കത്തികൾ വിൽക്കുന്നത് കുറ്റകരമാക്കി മാറ്റുകയും ഇതിൽ വീഴ്ച വരുത്തുന്ന കച്ചവടക്കാർക്ക് 11,000 ഡോളർ പിഴയോ ഒരു വർഷം തടവോ ശിക്ഷ ലഭിക്കുമെന്ന് വ്യവസ്ഥ ചെയ്യുകയും ചെയ്തിട്ടുണ്ട്. മഷെറ്റികൾ, വാളുകൾ എന്നിവ കൈവശം വെക്കുന്നതിനും നിയന്ത്രണങ്ങൾ ബാധകമാണ്. കൂടാതെ എൽജിബിടിക്യു കമ്മ്യൂണിറ്റിക്കും മറ്റ് വിഭാഗങ്ങൾക്കും നേരെയുള്ള വിദ്വേഷ അക്രമങ്ങൾ തടയാൻ പുതിയ വകുപ്പുകൾ ചേർത്തിട്ടുണ്ട്. ഡേറ്റിംഗ് ആപ്പുകൾ വഴിയോ മറ്റോ ആളുകളെ കെണിയിൽപ്പെടുത്തി ആക്രമിക്കുന്നവർക്കും ഇത്തരം ദൃശ്യങ്ങൾ സോഷ്യൽ മീഡിയയിൽ പ്രചരിപ്പിക്കുന്നവർക്കും കടുത്ത ശിക്ഷ ലഭിക്കും. വിദ്വേഷം പ്രചരിപ്പിക്കുന്നവർക്കുള്ള ശിക്ഷ അഞ്ച് വർഷം മുതൽ ഏഴ് വർഷം വരെ തടവായി വർദ്ധിപ്പിച്ചു.
ഗാർഹിക പീഡനക്കേസുകളിൽ പ്രതികളാകുന്നവർക്ക് ജാമ്യം അനുവദിക്കുന്നതിലും ഇലക്ട്രോണിക് മോണിറ്ററിംഗ് ഉൾപ്പെടെയുള്ള സംവിധാനങ്ങളിലൂടെ ഇവരെ നിരീക്ഷിക്കുന്നതിലും നിയമം കർശനമായ മാറ്റങ്ങൾ കൊണ്ടുവരുന്നു. ബോണ്ടി ജംഗ്ഷനിലും മറ്റും നടന്ന അക്രമസംഭവങ്ങളുടെ പശ്ചാത്തലത്തിലാണ് സർക്കാർ ഈ അടിയന്തര നീക്കം നടത്തിയത്. ഓരോ പൗരനും സുരക്ഷിതമായി പുറത്തിറങ്ങാൻ കഴിയണം എന്ന ലക്ഷ്യത്തോടെയാണ് പോലീസിന് ആവശ്യമായ നിയമപരമായ അധികാരങ്ങൾ നൽകുന്നതെന്ന് പ്രീമിയർ ക്രിസ് മിൻസ് വാർത്താ സമ്മേളനത്തിൽ വ്യക്തമാക്കി. ഈ പുതിയ നിയമങ്ങൾ നടപ്പിലാക്കുന്നതിലൂടെ പൊതുസ്ഥലങ്ങളിലെ ആയുധങ്ങളുടെ എണ്ണം കുറയ്ക്കാനും കുറ്റകൃത്യങ്ങൾ തടയാനും കഴിയുമെന്നാണ് പോലീസ് വകുപ്പ് പ്രതീക്ഷിക്കുന്നത്.
