മെൽബൺ: വരാനിരിക്കുന്ന ഫെഡറൽ ബജറ്റിൽ സാധാരണക്കാർക്ക് ആശ്വാസമായി കൂടുതൽ ജീവിതച്ചെലവ് കുറയ്ക്കൽ പദ്ധതികൾ (Cost-of-living relief) ഉൾപ്പെടുത്തുമെന്ന് പ്രധാനമന്ത്രി ആന്തണി ആൽബനീസ് സൂചിപ്പിച്ചു. പണപ്പെരുപ്പവും ആഗോള തലത്തിലെ ഇന്ധന പ്രതിസന്ധിയും ഓസ്ട്രേലിയൻ കുടുംബങ്ങളെ ബാധിക്കുന്ന പശ്ചാത്തലത്തിൽ, മെയ് 12-ന് അവതരിപ്പിക്കുന്ന ബജറ്റിൽ നിർണ്ണായക പ്രഖ്യാപനങ്ങൾ ഉണ്ടാകുമെന്നാണ് റിപ്പോർട്ടുകൾ.
2026 ജൂലൈ 1 മുതൽ പ്രാബല്യത്തിൽ വരുന്ന രീതിയിൽ എല്ലാ നികുതിദായകർക്കും ഗുണകരമാകുന്ന നികുതി ഇളവുകൾ സർക്കാർ പ്രഖ്യാപിച്ചിട്ടുണ്ട്. 18,201 രൂപയ്ക്കും 45,000 രൂപയ്ക്കും ഇടയിലുള്ള വരുമാന പരിധിയിലെ നികുതി 16 ശതമാനത്തിൽ നിന്ന് 15 ശതമാനമായി കുറയ്ക്കും. ഇത് ശരാശരി വരുമാനമുള്ള ഒരു തൊഴിലാളിക്ക് പ്രതിവർഷം നൂറുകണക്കിന് ഡോളറിന്റെ അധിക ലാഭം നൽകും.
ഊർജ്ജ നിരക്ക് വർദ്ധനവ് തടയാൻ വീടുകൾക്കും ചെറുകിട ബിസിനസ്സുകൾക്കും നേരിട്ടുള്ള സാമ്പത്തിക സഹായം നൽകുന്നത് തുടരും. ഇതിനകം പ്രഖ്യാപിച്ച 150 ഡോളറിന്റെ ‘എനർജി ബിൽ റിലീഫ്’ (Energy Bill Relief) ഗഡുക്കളായി ഉപഭോക്താക്കളുടെ അക്കൗണ്ടിലേക്ക് നേരിട്ടെത്തും.
ജനുവരി മുതൽ നടപ്പിലാക്കുന്ന രീതിയിൽ പിബിഎസ് (PBS) മരുന്നുകളുടെ പരമാവധി വില 31.60 ഡോളറിൽ നിന്ന് 25 ഡോളറായി കുറയ്ക്കും. ഇത് ദീർഘകാല രോഗങ്ങൾക്കുള്ള മരുന്നുകൾ വാങ്ങുന്നവർക്ക് വലിയ ആശ്വാസമാകും.
ദ്യാർത്ഥികളുടെ പഠന വായ്പകളിൽ (HECS/HELP) 20 ശതമാനം ഇളവ് നൽകാനും വായ്പ തിരിച്ചടവ് ആരംഭിക്കേണ്ട കുറഞ്ഞ വരുമാന പരിധി 67,000 ഡോളറായി ഉയർത്താനും സർക്കാർ പദ്ധതിയിടുന്നു.
അതേസമയം, ഗ്യാസ് കയറ്റുമതിക്ക് മേൽ 25 ശതമാനം അധിക നികുതി ഏർപ്പെടുത്തണമെന്ന ആവശ്യത്തെ പ്രധാനമന്ത്രി ഇന്ന് തള്ളി. നിലവിലുള്ള കരാറുകളെ ബാധിക്കുന്ന തരത്തിലുള്ള നീക്കങ്ങൾ രാജ്യത്തിന്റെ സാമ്പത്തിക സുരക്ഷിതത്വത്തെ ബാധിക്കുമെന്നാണ് സർക്കാരിന്റെ നിലപാട്. പണപ്പെരുപ്പത്തെ പിടിച്ചുനിർത്താൻ എൻഡിഐഎസ് (NDIS) പോലുള്ള പദ്ധതികളിൽ ചെലവ് ചുരുക്കൽ നടത്തുമെന്നും സൂചനയുണ്ട്.
തദ്ദേശീയമായ ഉൽപ്പാദനം വർദ്ധിപ്പിക്കാനായി ‘ഫ്യൂച്ചർ മെയ്ഡ് ഇൻ ഓസ്ട്രേലിയ’ (Future Made in Australia) പദ്ധതിക്കായി വൻതോതിലുള്ള നിക്ഷേപവും ബജറ്റിൽ പ്രതീക്ഷിക്കുന്നുണ്ട്. ജീവിതച്ചെലവ് വർദ്ധനവിൽ വലയുന്ന ജനങ്ങൾക്ക് ഈ ബജറ്റ് ഒരു കൈത്താങ്ങാകുമെന്നാണ് ലേബർ സർക്കാരിന്റെ അവകാശവാദം.
