തിരുവനന്തപുരം: കോൺഗ്രസിനുള്ളിലെ തർക്കങ്ങൾ തെരുവിലേക്ക് പടരുന്നു. എ.ഐ.സി.സി ജനറൽ സെക്രട്ടറി കെ.സി. വേണുഗോപാലിനെതിരെയുള്ള പ്രതിഷേധം ഇപ്പോൾ രാഹുൽ ഗാന്ധിക്കും പ്രിയങ്ക ഗാന്ധിക്കുമെതിരെയുള്ള പരസ്യമായ വെല്ലുവിളിയായി മാറിയിരിക്കുകയാണ്. ‘കെ.സിയെ അനുകൂലിച്ചാൽ കേരളം മാപ്പ് തരില്ല’ എന്നും ‘വയനാട് അമേഠിയാകും’ എന്നുമുള്ള രൂക്ഷമായ മുന്നറിയിപ്പുകളടങ്ങിയ പോസ്റ്ററുകൾ സംസ്ഥാനത്തിന്റെ വിവിധ ഭാഗങ്ങളിൽ പ്രത്യക്ഷപ്പെട്ടു.
കെ.സി. വേണുഗോപാലിനെ അനുകൂലിക്കുന്ന നിലപാടാണ് ഹൈക്കമാൻഡ് സ്വീകരിക്കുന്നതെങ്കിൽ അതിന്റെ പ്രത്യാഘാതം ഗുരുതരമായിരിക്കുമെന്ന സൂചനയാണ് ‘മുഖ്യമന്ത്രി’ എന്ന പേരിലുള്ള ഈ പ്രതിഷേധം നൽകുന്നത്. അമേഠിയിൽ നേരിട്ട പരാജയം വയനാട്ടിലും ആവർത്തിക്കുമെന്ന ഭീഷണി പാർട്ടി നേതൃത്വത്തെ ഞെട്ടിച്ചിട്ടുണ്ട്. മുതിർന്ന നേതാക്കൾക്കെതിരെ ഇത്തരത്തിൽ പരസ്യമായ പോസ്റ്റർ പ്രചാരണം നടക്കുന്നത് കോൺഗ്രസ് അണികൾക്കിടയിലെ അതൃപ്തി എത്രത്തോളം ആഴത്തിലുള്ളതാണെന്ന് വ്യക്തമാക്കുന്നു.
കെ.സി. വേണുഗോപാലിന്റെ പ്രവർത്തനശൈലിയിൽ വലിയൊരു വിഭാഗം പ്രാദേശിക നേതാക്കളും പ്രവർത്തകരും നേരത്തെ തന്നെ അതൃപ്തി പ്രകടിപ്പിച്ചിരുന്നു. എന്നാൽ ഗാന്ധി കുടുംബവുമായി അടുത്ത ബന്ധം പുലർത്തുന്ന അദ്ദേഹത്തെ സംരക്ഷിക്കുന്ന നിലപാടാണ് രാഹുലും പ്രിയങ്കയും സ്വീകരിക്കുന്നത്. ഇതാണ് പ്രവർത്തകരെ പ്രകോപിപ്പിച്ചത്. വരാനിരിക്കുന്ന തിരഞ്ഞെടുപ്പുകളിൽ ഈ ആഭ്യന്തര കലഹം പാർട്ടിയുടെ പ്രകടനത്തെ ദോഷകരമായി ബാധിക്കുമെന്ന ആശങ്കയിലാണ് രാഷ്ട്രീയ നിരീക്ഷകർ. സംഭവത്തിൽ പാർട്ടി നേതൃത്വം ഇതുവരെ ഔദ്യോഗികമായി പ്രതികരിച്ചിട്ടില്ല.
