നിപ രോഗലക്ഷണങ്ങളെ തുടർന്ന് ആശുപത്രി നിരീക്ഷണത്തിലായിരുന്ന രണ്ടുപേരെ പരിശോധനാഫലം നെഗറ്റീവായതിനെ തുടർന്ന് ആശുപത്രിയിൽ നിന്ന് ഡിസ്ചാർജ് ചെയ്തു. അതേസമയം, രോഗലക്ഷണങ്ങൾ പ്രകടമായതിനെ തുടർന്ന് ഒരാളെ കൂടി നിരീക്ഷണത്തിനായി ആശുപത്രിയിൽ പ്രവേശിപ്പിച്ചു.
ഇതോടെ സമ്പർക്കപ്പട്ടികയിൽ നിന്ന് ആശുപത്രിയിൽ പ്രവേശിപ്പിക്കപ്പെട്ട ഒമ്പത് പേരിൽ നാലുപേർ ആശുപത്രിവിട്ടപ്പോൾ അഞ്ചുപേർ ഇപ്പോഴും നിരീക്ഷണത്തിലാണ്. ഇന്നലെ ആശുപത്രിയിൽ പ്രവേശിപ്പിച്ച വ്യക്തിയുടെയും പരിശോധനാഫലം നെഗറ്റീവാണെന്ന് ആരോഗ്യവകുപ്പ് അറിയിച്ചു. സമ്പർക്കപ്പട്ടികയിലുള്ള 13 പേരുടെയും സമാന രോഗലക്ഷണങ്ങളുള്ള 24 പേരുടെയും ഉൾപ്പെടെ 37 പേരുടെ സ്രവസാമ്പിളുകൾ പരിശോധിച്ചതിൽ എല്ലാം നെഗറ്റീവ് ഫലമാണ് ലഭിച്ചത്.
കോഴിക്കോട് ജില്ലയിൽ പുതിയ നിപ കേസുകളൊന്നും റിപ്പോർട്ട് ചെയ്തിട്ടില്ല. കോഴിക്കോട് സർക്കാർ മെഡിക്കൽ കോളേജ് ആശുപത്രിയിൽ ചികിത്സയിലുള്ള സ്ഥിരീകരിച്ച നിപ രോഗി വെന്റിലേറ്ററിലാണുള്ളത്. രോഗിക്ക് സർക്കാർ, ഐസിഎംആർ മാർഗനിർദേശങ്ങൾ അനുസരിച്ചുള്ള ചികിത്സ തുടരുകയാണെന്ന് അധികൃതർ അറിയിച്ചു.
നിലവിൽ സമ്പർക്കപ്പട്ടികയിൽ 104 പേരാണുള്ളത്. ഇതിൽ നാല് പേർ അതീവ ഉയർന്ന അപകടസാധ്യതയുള്ള വിഭാഗത്തിലും 14 പേർ ഉയർന്ന അപകടസാധ്യതാ വിഭാഗത്തിലും 86 പേർ കുറഞ്ഞ അപകടസാധ്യതാ വിഭാഗത്തിലുമാണ്. സമ്പർക്കപ്പട്ടികയിലുള്ളവരിൽ 45 പേർ ആരോഗ്യപ്രവർത്തകരാണ്.
നിപയുടെ ഉറവിടം കണ്ടെത്തുന്നതിനുള്ള അന്വേഷണത്തിന്റെ ഭാഗമായി പ്രഭവകേന്ദ്രത്തിന് സമീപം മൃഗസംരക്ഷണ വകുപ്പിന്റെ നേതൃത്വത്തിൽ വവ്വാലുകൾ, നായകൾ, പൂച്ചകൾ എന്നിവയിൽ നിന്ന് സാമ്പിളുകൾ ശേഖരിച്ചു. ഇവ ഭോപ്പാലിലെ നാഷണൽ ഇൻസ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമൽ ഡിസീസസ് (NIHSAD) ലാബിലേക്ക് പരിശോധനയ്ക്കായി അയക്കും. കൂടാതെ, കേന്ദ്രസംഘം രോഗി ചികിത്സ തേടിയ സ്വകാര്യ ആശുപത്രി സന്ദർശിക്കുകയും ജില്ലയിലെ സ്കൂളുകളിൽ നിപ ബോധവത്കരണ പരിപാടികൾ സംഘടിപ്പിക്കുകയും ചെയ്തു.
