പട്ന: വാഹനം മോഷണം പോകുമെന്ന ആശങ്കയെ തുടർന്ന് പുതിയ മഹീന്ദ്ര സ്കോർപിയോ ക്രെയിൻ ഉപയോഗിച്ച് വീടിന്റെ രണ്ടാം നിലയിലെ ടെറസിൽ എത്തിച്ച് ഉടമ. ബിഹാറിലെ ഗോപാൽഗഞ്ചിലാണ് സംഭവം റിപ്പോർട്ട് ചെയ്തത്. മനോജ് യാദവ് എന്നയാളാണ് അടുത്തിടെ വാങ്ങിയ മഹീന്ദ്ര സ്കോർപിയോ ക്ലാസിക് സുരക്ഷിതമായി സൂക്ഷിക്കാൻ ഇത്തരമൊരു നടപടി സ്വീകരിച്ചത്.
ഇസ്രയേലിൽ ജോലി ചെയ്യുന്ന മനോജ് യാദവ് വിദേശത്തായിരിക്കുമ്പോൾ വാഹനം ഡ്രൈവറെയാണ് ഏൽപ്പിച്ചിരുന്നത്. എന്നാൽ വാഹനത്തിന്റെ സുരക്ഷയെക്കുറിച്ച് ആശങ്ക ഉയർന്നതിനെ തുടർന്ന് കുടുംബവുമായി ആലോചിച്ചാണ് വാഹനം വീടിന്റെ രണ്ടാം നിലയിലെ ടെറസിലേക്ക് മാറ്റാൻ തീരുമാനിച്ചതെന്ന് റിപ്പോർട്ടിൽ പറയുന്നു.
തുടർന്ന് വലിയ ക്രെയിൻ ഉപയോഗിച്ച് വാഹനം വീടിന് മുകളിലേക്ക് ഉയർത്തുകയായിരുന്നു. വാഹനത്തെ ക്രെയിൻ ഉപയോഗിച്ച് രണ്ടാം നിലയിലെത്തിക്കുന്ന ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് സംഭവം ശ്രദ്ധ നേടിയത്.
സംഭവത്തിൽ വാഹനമോഷണം നടന്നതായി റിപ്പോർട്ടില്ല. മോഷണം ഒഴിവാക്കുന്നതിനായി ഉടമ തന്നെ സ്വീകരിച്ച മുൻകരുതൽ നടപടിയാണ് ഇതെന്നാണ് ലഭ്യമായ വിവരങ്ങൾ.
