സിഡ്നി: സിഡ്നിയിലെ പ്രശസ്തമായ കൂജി ബീച്ചിൽ ശനിയാഴ്ച രാവിലെയുണ്ടായ വൻസ്രാവ് ആക്രമണത്തിൽ ഓസ്ട്രേലിയൻ സ്വദേശിയായ യുവ അധ്യാപികയ്ക്ക് ഗുരുതരമായി പരിക്കേറ്റു. ഹർസ്റ്റ്വിൽ അഡ്വന്റിസ്റ്റ് സ്കൂളിലെ പ്രൈമറി വിഭാഗം അധ്യാപികയും ഒരു വയസ്സുകാരിയുടെ അമ്മയുമായ ലിയാ സ്റ്റുവർട്ട് (34) ആണ് ആക്രമണത്തിന് ഇരയായത്. സ്രാവിന്റെ കടിയേറ്റ് ഗുരുതരമായി പരിക്കേറ്റ ലിയായുടെ ഒരു കൈ ശസ്ത്രക്രിയയിലൂടെ മുറിച്ചുമാറ്റി. ജീവൻ രക്ഷിക്കാനുള്ള തീവ്രശ്രമത്തിലാണ് ഡോക്ടർമാർ.
ബീച്ചിലെ സുരക്ഷിത മേഖലയിൽ നീന്തുന്നതിനിടയിലാണ് ഏകദേശം മൂന്ന് മുതൽ നാല് മീറ്റർ വരെ നീളമുള്ള ‘ഗ്രേറ്റ് വൈറ്റ് ഷാർക്ക്’ ഇനത്തിൽപ്പെട്ട സ്രാവ് ലിയായെ ആക്രമിച്ചത്. ഈ സമയം ലിയായുടെ ഒരു വയസ്സുള്ള മകൾ സുഹൃത്തിനൊപ്പം ബീച്ചിലുണ്ടായിരുന്നു. സമീപത്ത് പാഡിൽബോർഡിംഗിൽ ഏർപ്പെട്ടിരുന്ന ഓഫ് ഡ്യൂട്ടി ലൈഫ് ഗാർഡ് ചാർലി വെർകോയാണ് ലിയായെ സ്രാവിന്റെ പിടിയിൽ നിന്നും സാഹസികമായി രക്ഷപെടുത്തി കരയിലെത്തിച്ചത്. കരയിലെത്തിക്കുമ്പോഴേക്കും ബോധം നഷ്ടപ്പെട്ടിരുന്ന ലിയായ്ക്ക് ബീച്ചിൽ വെച്ചുതന്നെ അടിയന്തരമായി രക്തം നൽകുകയും തുടർന്ന് എയർലിഫ്റ്റ് വഴി വിമാനമാർഗ്ഗം സെന്റ് വിൻസെന്റ് ആശുപത്രിയിൽ പ്രവേശിപ്പിക്കുകയും ചെയ്തു.
നിലവിൽ തീവ്രപരിചരണ വിഭാഗത്തിൽ ലൈഫ് സപ്പോർട്ടിൽ കഴിയുന്ന ലിയായെ ബുധനാഴ്ച വിദഗ്ധ ഡോക്ടർമാരുടെ നേതൃത്വത്തിൽ വീണ്ടും സങ്കീർണ്ണമായ ശസ്ത്രക്രിയയ്ക്ക് വിധേയയാക്കി. സമുദ്രത്തിലെ മണലും അവശിഷ്ടങ്ങളും മുറിവുകളിൽ കലർന്നതിനാൽ കടുത്ത അണുബാധയ്ക്കുള്ള സാധ്യതയുണ്ടെന്ന് ലിയായുടെ സഹോദരൻ ജോഷ്വ സ്റ്റുവർട്ട് അറിയിച്ചു. നഴ്സ് കൂടിയായ അമ്മയും വിദേശത്തുനിന്ന് അടിയന്തരമായി തിരിച്ചെത്തിയ പങ്കാളി ഫെർണാണ്ടോയും ആശുപത്രിയിൽ ലിയായ്ക്കൊപ്പമുണ്ട്. വിമാനത്താവള റൂട്ടായതിനാൽ ഡ്രോൺ നിരീക്ഷണത്തിന് ഇവിടെ നേരത്തെ അനുമതിയുണ്ടായിരുന്നില്ലെന്നും, അപകടത്തെ തുടർന്ന് താൽക്കാലികമായി ഡ്രോൺ നിരീക്ഷണത്തിന് അധികൃതർ അനുമതി നൽകിയിട്ടുണ്ടെന്നും വ്യക്തമായിട്ടുണ്ട്.
ലിയായുടെ കുടുംബത്തെ സഹായിക്കാനായി സഹോദരൻ ആരംഭിച്ച ഗോഫണ്ട്മീ (GoFundMe) കാമ്പയിനിലൂടെ ഇതിനകം 4,45,000 ഡോളറിലധികം തുക സമാഹരിച്ചു കഴിഞ്ഞു. പ്രിയപ്പെട്ട അധ്യാപികയുടെ രോഗമുക്തിക്കായി പ്രാർത്ഥനകളോടെ വിദ്യാർത്ഥികളും രക്ഷിതാക്കളും സഹപ്രവർത്തകരും ഒപ്പമുണ്ട്. പത്ത് വർഷം മുൻപ് ടിവി ഷോയായ ‘സർവൈവർ’ കാണുന്നതിനിടയിൽ തനിക്കും എന്നെങ്കിലും അതിൽ പങ്കെടുക്കണമെന്ന് ലിയാ ആഗ്രഹം പ്രകടിപ്പിച്ചിരുന്നതായി മുൻ സഹപ്രവർത്തകർ ഓർക്കുന്നു. ഇന്ന് ജീവിതത്തിലെ ഏറ്റവും വലിയ പ്രതിസന്ധിയെ നേരിട്ടുകൊണ്ട് ലിയാ യഥാർത്ഥ ജീവിതത്തിലെ ഒരു ‘സർവൈവർ’ (അതിജീവിച്ചവൾ) ആയി തിരിച്ചുവരുമെന്ന പ്രതീക്ഷയിലാണ് സുഹൃത്തുക്കളും പ്രിയപ്പെട്ടവരും.
