വിമർശിക്കുന്നവർ “വിഡ്ഢികൾ”; വിമർശനങ്ങൾക്ക് മറുപടിയുമായി അമേരിക്കൻ പ്രസിഡന്റ്
അമേരിക്കയും ഇറാനും തമ്മിൽ ഒപ്പുവെച്ച ധാരണാപത്രത്തെ (MoU) വിമർശിച്ചവർക്കെതിരെ അമേരിക്കൻ പ്രസിഡന്റ് ഡൊണാൾഡ് ട്രംപ് രൂക്ഷമായി പ്രതികരിച്ചു. ഇറാനോട് വേണ്ടത്ര കടുത്ത നിലപാട് സ്വീകരിച്ചില്ലെന്ന് ആരോപിക്കുന്നവർ “അസൂയക്കാരോ, മോശം ആളുകളോ, അല്ലെങ്കിൽ വിഡ്ഢികളോ” ആണെന്ന് ട്രംപ് പറഞ്ഞു.
മധ്യപൂർവേഷ്യയിലെ സംഘർഷം അവസാനിപ്പിക്കാൻ ലക്ഷ്യമിട്ടാണ് അമേരിക്കയും ഇറാനും ധാരണാപത്രത്തിൽ ഒപ്പുവെച്ചത്. ഈ കരാർ സാമ്പത്തിക പ്രതിസന്ധി ഒഴിവാക്കാൻ സഹായിച്ചതാണെന്നും, യുദ്ധം തുടർന്നിരുന്നെങ്കിൽ എണ്ണവിതരണവും ആഗോള സമ്പദ്വ്യവസ്ഥയും ഗുരുതര പ്രതിസന്ധിയിലാകുമായിരുന്നുവെന്നും ട്രംപ് വ്യക്തമാക്കി.
കരാർ പ്രകാരം ഇറാൻ ആണവായുധങ്ങൾ വികസിപ്പിക്കില്ലെന്ന് പ്രതിജ്ഞാബദ്ധമായിട്ടുണ്ടെങ്കിലും, ആണവപരിപാടിയുമായി ബന്ധപ്പെട്ട വിശദമായ ചർച്ചകൾ അടുത്ത 60 ദിവസത്തിനുള്ളിൽ പ്രത്യേകം നടക്കും. മറുപടിയായി ഇറാനെതിരായ ഉപരോധങ്ങളിൽ ഇളവുകൾ ലഭിക്കുമെന്ന സാധ്യതയാണ് വിമർശനങ്ങൾക്ക് കാരണമായത്.
അതേസമയം, ധാരണാപത്രത്തിന്റെ പൂർണരൂപം കോൺഗ്രസിന് കൈമാറണമെന്നും, കരാറിന്റെ വ്യവസ്ഥകൾ പൊതുജനങ്ങൾക്ക് വ്യക്തമാക്കണമെന്നും ചില അമേരിക്കൻ നിയമനിർമ്മാതാക്കൾ ആവശ്യപ്പെട്ടിട്ടുണ്ട്. കരാർ അമേരിക്കയുടെ ചർച്ചാ നിലപാടിനെ ദുർബലപ്പെടുത്തുമെന്നും വിമർശകർ ആരോപിക്കുന്നു.
