വാഷിങ്ടൺ: ചെങ്കടലിലും സമീപ സമുദ്രമേഖലകളിലും കപ്പലുകൾക്കും ചരക്കുകൾക്കും ഉണ്ടാകുന്ന നാശനഷ്ടങ്ങൾക്ക് നഷ്ടപരിഹാരം നൽകാൻ അമേരിക്ക മരവിപ്പിച്ചിരിക്കുന്ന ഇറാന്റെ ആസ്തികൾ ഉപയോഗിക്കുമെന്ന് യു.എസ്. പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചു. ഇറാന്റെ പിന്തുണയുള്ള ഹൂത്തി ആക്രമണങ്ങൾക്ക് ഇറാനെ ഉത്തരവാദിയാക്കുമെന്നും അദ്ദേഹം മുന്നറിയിപ്പ് നൽകി.
ഇനി മുതൽ കപ്പലുകൾക്കും ചരക്കുകൾക്കും അനുബന്ധ സ്വത്തിനും സംഭവിക്കുന്ന എല്ലാ നാശനഷ്ടങ്ങൾക്കും ഇറാന്റെ മരവിപ്പിച്ച ഫണ്ടുകളിൽ നിന്നായിരിക്കും നഷ്ടപരിഹാരം നൽകുകയെന്ന് ട്രംപ് സമൂഹമാധ്യമമായ ട്രൂത്ത് സോഷ്യലിലൂടെ വ്യക്തമാക്കി. ചെങ്കടലിലെ കപ്പൽഗതാഗതത്തിന് നേരെയുള്ള ആക്രമണങ്ങൾ അവസാനിപ്പിക്കണമെന്ന ആവശ്യവും അദ്ദേഹം ഉന്നയിച്ചു.
ട്രംപിന്റെ പ്രഖ്യാപനത്തെ ഇറാൻ ശക്തമായി അപലപിച്ചു. മറ്റൊരു രാജ്യത്തിന്റെ മരവിപ്പിച്ച ആസ്തികൾ ഇത്തരത്തിൽ ഉപയോഗിക്കുമെന്ന ഭീഷണി അന്താരാഷ്ട്ര നിയമത്തിനും ആഗോള സാമ്പത്തിക സംവിധാനത്തിനും അപകടകരമായ മാതൃകയാണെന്ന് ഇറാൻ പ്രതികരിച്ചു.
