ന്യൂയോർക്ക്: ഫിഫ പ്രസിഡന്റ് ജിയാനി ഇൻഫന്റീനോയെ സ്ഥാനത്തുനിന്ന് മാറ്റാനുള്ള നീക്കം ഉണ്ടായാൽ അത് വലിയ തെറ്റായിരിക്കുമെന്ന് യുഎസ് പ്രസിഡന്റ് ഡോണൾഡ് ട്രംപ്. ഇൻഫന്റീനോ മികച്ച സംഘാടകനാണെന്നും അടുത്തിടെ നടന്ന ലോകകപ്പ് ചരിത്രത്തിലെ ഏറ്റവും വിജയകരമായ ലോകകപ്പായിരുന്നെന്നും ട്രംപ് സോഷ്യൽ മീഡിയ പോസ്റ്റിൽ പറഞ്ഞു.
ഫിഫയുടെ മത്സരങ്ങളുടെയും ലോകകപ്പിന്റെയും വാണിജ്യ അവകാശങ്ങളിൽ പങ്ക് സ്വകാര്യ നിക്ഷേപകർക്ക് വിൽക്കാനുള്ള ഇൻഫന്റീനോയുടെ നിർദേശമാണ് ഫിഫയ്ക്കുള്ളിൽ വലിയ പ്രതിഷേധത്തിന് കാരണമായത്. കടുത്ത എതിർപ്പിനെ തുടർന്ന് പദ്ധതി പിൻവലിക്കുകയും ഫിഫ മാപ്പുപറയുകയും ചെയ്തിരുന്നു. എന്നാൽ ഇതോടെ ഇൻഫന്റീനോയ്ക്കെതിരായ വിമർശനം അവസാനിച്ചില്ല.
യുവേഫ, കോൺകാകാഫ്, ഏഷ്യൻ ഫുട്ബോൾ കോൺഫെഡറേഷൻ എന്നിവ ഉൾപ്പെടെയുള്ള സംഘടനകൾ ഇൻഫന്റീനോയുടെ നേതൃത്വത്തെ വിമർശിക്കുകയും വിശ്വാസം നഷ്ടപ്പെട്ടതായി വ്യക്തമാക്കുകയും ചെയ്തിട്ടുണ്ട്. അടുത്ത വർഷം മാർച്ചിൽ ഫിഫ പ്രസിഡന്റ് തിരഞ്ഞെടുപ്പ് നടക്കാനിരിക്കെയാണ് നേതൃത്വത്തെച്ചൊല്ലിയുള്ള തർക്കം രൂക്ഷമായിരിക്കുന്നത്.
