വാഷിംഗ്ടൺ/ഇസ്ലാമാബാദ്: സമുദ്ര ഉപരോധം ലംഘിക്കുന്ന ഇറാനിയൻ ബോട്ടുകൾ വെടിവെച്ചു വീഴ്ത്താൻ അമേരിക്കൻ സൈന്യത്തിന് ഉത്തരവ് നൽകുമെന്ന് പ്രസിഡന്റ് ഡൊണാൾഡ് ട്രംപിന്റെ മുന്നറിയിപ്പ്. പശ്ചിമേഷ്യയിൽ സംഘർഷം നിലനിൽക്കുന്ന പശ്ചാത്തലത്തിലാണ് ഇറാനെതിരെ കടുത്ത നിലപാടുമായി അമേരിക്ക രംഗത്തെത്തിയിരിക്കുന്നത്. അതേസമയം, മേഖലയിൽ നിലവിലുള്ള വെടിനിർത്തൽ തുടരുന്നതായി മധ്യസ്ഥ ചർച്ചകൾക്ക് നേതൃത്വം നൽകുന്ന പാകിസ്ഥാൻ അറിയിച്ചു.
രാജ്യാന്തര സമുദ്ര നിയമങ്ങൾ ലംഘിക്കുന്നതോ അമേരിക്കൻ കപ്പലുകളെ പ്രകോപിപ്പിക്കുന്നതോ ആയ ഇറാനിയൻ ബോട്ടുകളെ തകർക്കാൻ സൈന്യത്തിന് അനുമതി നൽകുമെന്ന് ട്രംപ് വ്യക്തമാക്കി. ഇറാന്റെ ഭാഗത്തുനിന്നുള്ള ഭീഷണികളെ ചെറുക്കുമെന്നും അദ്ദേഹം കൂട്ടിച്ചേർത്തു.ഇസ്ലാമാബാദിൽ നടന്ന ചർച്ചകൾക്ക് പിന്നാലെ മേഖലയിൽ നിലവിൽ വന്ന വെടിനിർത്തൽ ഇപ്പോഴും പ്രാബല്യത്തിലുണ്ടെന്ന് പാകിസ്ഥാൻ വിദേശകാര്യ മന്ത്രാലയം വ്യക്തമാക്കി. സമാധാന ശ്രമങ്ങൾ പുരോഗമിക്കുകയാണെന്നും പാകിസ്ഥാൻ അറിയിച്ചു.
ഇസ്രായേലും ഇറാനും തമ്മിലുള്ള യുദ്ധസാഹചര്യം ഒഴിവാക്കാൻ അന്താരാഷ്ട്ര തലത്തിൽ സമ്മർദ്ദം തുടരുകയാണ്. ഇതിനിടയിലാണ് ഉപരോധം കർശനമാക്കാൻ അമേരിക്ക തീരുമാനിച്ചിരിക്കുന്നത്.ഇറാന്റെ എണ്ണക്കടത്തും ആയുധ നീക്കങ്ങളും തടയുക എന്ന ലക്ഷ്യത്തോടെയാണ് സമുദ്ര ഉപരോധം ഏർപ്പെടുത്തിയിരിക്കുന്നത്. ഇത് ലംഘിക്കുന്നവർക്കെതിരെ കർശന നടപടി ഉണ്ടാകുമെന്നാണ് വൈറ്റ് ഹൗസ് നൽകുന്ന സൂചന.യുഎസ് ഭരണകൂടത്തിന്റെ പുതിയ നിലപാട് പശ്ചിമേഷ്യയിലെ സമാധാന ചർച്ചകളെ എങ്ങനെ ബാധിക്കുമെന്ന ആശങ്കയിലാണ് നയതന്ത്ര ലോകം. എന്നാൽ വെടിനിർത്തൽ തകർന്നിട്ടില്ലെന്ന പാകിസ്ഥാന്റെ പ്രസ്താവന താൽക്കാലിക ആശ്വാസം നൽകുന്നുണ്ട്.
