അബുദാബി: എണ്ണ ഉത്പാദക രാജ്യങ്ങളുടെ സംഘടനയായ ഒപെക്കിൽ (OPEC) നിന്ന് യു.എ.ഇ പിന്മാറുമെന്ന് പ്രഖ്യാപിച്ചു. മേയ് 1 മുതൽ തീരുമാനം പ്രാബല്യത്തിൽ വരും.
ഏകദേശം അഞ്ച് ദശാബ്ദത്തിലേറെ നീണ്ട അംഗത്വത്തിന് ശേഷമാണ് യു.എ.ഇയുടെ പിന്മാറ്റം. രാജ്യത്തിന്റെ ദീർഘകാല സാമ്പത്തിക-ഊർജ നയവും ഉത്പാദന ശേഷി വർധിപ്പിക്കാനുള്ള ലക്ഷ്യവും പരിഗണിച്ചാണ് തീരുമാനം എടുത്തതെന്ന് ഔദ്യോഗിക വിശദീകരണം.
ഒപെക് നിശ്ചയിക്കുന്ന ഉത്പാദന നിയന്ത്രണങ്ങൾ കാരണം ആവശ്യത്തിനനുസരിച്ച് എണ്ണ ഉത്പാദനം വർധിപ്പിക്കാൻ കഴിയാത്തത് യു.എ.ഇയ്ക്ക് അസൗകര്യമായിരുന്നുവെന്നാണ് വിലയിരുത്തൽ. പിന്മാറ്റത്തോടെ രാജ്യത്തിന് കൂടുതൽ സ്വതന്ത്രമായി ഉത്പാദന നയം തീരുമാനിക്കാനാകും.
ലോകത്തിലെ പ്രധാന എണ്ണ ഉത്പാദകരിൽ ഒരാളായ യു.എ.ഇയുടെ ഈ നീക്കം ഒപെക്കിന്റെ സ്വാധീനം കുറയ്ക്കാൻ ഇടയാക്കുമെന്ന് വിദഗ്ധർ ചൂണ്ടിക്കാണിക്കുന്നു. ആഗോള എണ്ണവിപണിയിൽ അനിശ്ചിതത്വം വർധിക്കാനും വിലയിൽ മാറ്റങ്ങൾ സംഭവിക്കാനും സാധ്യതയുണ്ടെന്നും വിലയിരുത്തപ്പെടുന്നു.
മധ്യപൂർവ്വേഷ്യയിലെ സംഘർഷാവസ്ഥയും ഊർജ വിപണിയിലെ സമ്മർദ്ദങ്ങളും നിലനിൽക്കുന്ന സാഹചര്യത്തിലാണ് യു.എ.ഇയുടെ ഈ നിർണായക തീരുമാനം.
