കീവ്: റഷ്യയ്ക്കും റഷ്യ അധീനതയിലുള്ള ക്രിമിയയ്ക്കുമെതിരെ യുക്രെയ്ൻ യുദ്ധത്തിലെ ഏറ്റവും വലിയ ഡ്രോൺ ആക്രമണങ്ങളിലൊന്ന് നടത്തി. റഷ്യൻ പ്രതിരോധ മന്ത്രാലയത്തിന്റെ അവകാശവാദപ്രകാരം, ഒരു രാത്രിക്കിടെ 660 യുക്രെയ്ൻ ഡ്രോണുകൾ വിവിധ മേഖലകളിൽ തടഞ്ഞുവീഴ്ത്തി. മോസ്കോ ഉൾപ്പെടെ നിരവധി റഷ്യൻ മേഖലകളും ക്രിമിയയും ആക്രമണലക്ഷ്യങ്ങളായി.
യുക്രെയ്ൻ സുരക്ഷാ ഏജൻസിയുടെ അവകാശവാദമനുസരിച്ച്, ക്രിമിയയിലെ കെർച്ച് തുറമുഖത്ത് റഷ്യൻ നാവികസേനയുടെ കപ്പലുകളെയും വ്യോമപ്രതിരോധ റഡാർ സംവിധാനങ്ങളെയും ഡ്രോണുകൾ ഉപയോഗിച്ച് ലക്ഷ്യമിട്ടു. തുല മേഖലയിലെ ഒരു രാസശാലയിലും ആക്രമണം നടന്നതായി സ്വതന്ത്ര റിപ്പോർട്ടുകൾ പറയുന്നു. അതേസമയം, ആക്രമണത്തിൽ കാര്യമായ നാശനഷ്ടങ്ങളോ ആളപായമോ ഉണ്ടായിട്ടില്ലെന്നാണ് റഷ്യൻ അധികൃതരുടെ നിലപാട്.
റഷ്യൻ ആക്രമണങ്ങൾ തുടരുന്നതിനിടെയാണ് യുക്രെയ്ൻ ദീർഘദൂര ഡ്രോൺ ആക്രമണങ്ങൾ ശക്തമാക്കിയത്. റഷ്യയുടെ തുടർ വ്യോമാക്രമണങ്ങളിൽ യുക്രെയ്നിലെ വിവിധ മേഖലകളിൽ സാധാരണക്കാർ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തതായി റിപ്പോർട്ടുകളുണ്ട്. ഇരു രാജ്യങ്ങളും യുദ്ധത്തടവുകാരുടെ കൈമാറ്റവും നടത്തിയിട്ടുണ്ട്.
