സിഡ്നി: ഓസ്ട്രേലിയയിലെ ഏറ്റവും പ്രശസ്തമായ പോർട്രെയ്റ്റ് പുരസ്കാരമായ ‘ആർച്ചീബാൾഡ് പ്രൈസ് 2026’ പ്രഖ്യാപിച്ചു. പ്രമുഖ ആദിവാസി ഗോത്ര നേതാവും കലാകാരിയും പരമ്പരാഗത വൈദ്യയുമായ ഇലുവാന്തി കെന്നിന്റെ തന്മയത്വമാർന്ന ചിത്രം വരച്ച റിച്ചാർഡ് ലൂവർ ആണ് ഒരു ലക്ഷം ഡോളർ (ഏകദേശം 83 ലക്ഷം രൂപ) സമ്മാനത്തുകയുള്ള ഈ പുരസ്കാരത്തിന് അർഹനായത്. സിഡ്നിയിലെ ആർട്ട് ഗാലറി ഓഫ് ന്യൂ സൗത്ത് വെയ്ൽസിൽ (AGNSW) വെള്ളിയാഴ്ച നടന്ന ചടങ്ങിലായിരുന്നു പ്രഖ്യാപനം.
ന്യൂസിലൻഡിൽ ജനിച്ച മെൽബൺ നിവാസിയായ റിച്ചാർഡ് ലൂവർ ഇത് ആറാം തവണയാണ് ആർച്ചീബാൾഡ് ഫൈനലിസ്റ്റാകുന്നത്. 1,034 അപേക്ഷകളിൽ നിന്ന് തിരഞ്ഞെടുക്കപ്പെട്ട 59 ഫൈനലിസ്റ്റുകളെ പിന്തള്ളിയാണ് ലൂവറിന്റെ ചിത്രം വിധിനിർണ്ണയ സമിതി ഏകകണ്ഠമായി തിരഞ്ഞെടുത്തത്. “ഇനി മുതൽ ‘ആറാം തവണയും ഫൈനലിസ്റ്റായ റിച്ചാർഡ് ലൂവർ’ എന്ന് ആരും വിളിക്കില്ലല്ലോ എന്നതാണ് ഈ വിജയത്തിലെ ഏറ്റവും വലിയ സന്തോഷം,” അദ്ദേഹം തമാശയായി പറഞ്ഞു.
ദക്ഷിണ ഓസ്ട്രേലിയയിലെ ആമതയിലുള്ള ‘തിജാല ആർട്സിൽ’ (Tjala Arts) ഇലുവാന്തിക്കൊപ്പം ചെലവഴിച്ച സമയമാണ് ഈ ചിത്രത്തിന് ആധാരമെന്ന് ലൂവർ വ്യക്തമാക്കി. “ഇലുവാന്തി ഒരു ചെറിയ സ്ത്രീയാണ്, എന്നാൽ വലിയൊരു അധികാരവും ആത്മവിശ്വാസവും അവർക്കുണ്ട്. അതുകൊണ്ട് തന്നെ അവരുടെ യഥാർത്ഥ വലുപ്പത്തിലാണ് (Life-size) ഞാൻ ചിത്രം വരച്ചത്. ആ കൈകളിലെ പെയിന്റ് പാടുകൾ അവർ ഇന്നും സജീവമായ ഒരു കലാകാരിയാണെന്ന് കാണിക്കുന്നു,” അദ്ദേഹം പറഞ്ഞു. തന്നെ സുന്ദരിയായും പുഞ്ചിരിക്കുന്ന മുഖത്തോടും കൂടി വരയ്ക്കണമെന്ന് ഇലുവാന്തി തമാശയായി ആവശ്യപ്പെട്ടിരുന്നതായും അദ്ദേഹം ഓർമ്മിച്ചു.
ആർച്ചീബാൾഡിനൊപ്പം മറ്റ് രണ്ട് പ്രധാന പുരസ്കാരങ്ങളും പ്രഖ്യാപിച്ചു:
വിൻ പ്രൈസ് (Wynne Prize): പ്രകൃതിദൃശ്യങ്ങൾക്കും ശില്പങ്ങൾക്കുമുള്ള 50,000 ഡോളറിന്റെ ഈ പുരസ്കാരം ‘ദ വാനംബി ട്രീ’ (The Waṉambi tree) എന്ന കൃതിക്ക് ഗയ്പലാനി വാനംബി സ്വന്തമാക്കി.
സൽമാൻ പ്രൈസ് (Sulman Prize): മികച്ച സബ്ജക്ട് പെയിന്റിംഗിനുള്ള 40,000 ഡോളർ പുരസ്കാരം ലൂസി കള്ളിറ്റൺ നേടി. തന്റെ പ്രിയപ്പെട്ട ഗ്രേഹൗണ്ട് വർഗ്ഗത്തിലുള്ള ‘ടൂള’ (Toolah) എന്ന നായയുടെ ചിത്രമാണ് ലൂസി വരച്ചത്.
പാക്കിംഗ് റൂം പ്രൈസ്: ഗാലറി ജീവനക്കാർ തിരഞ്ഞെടുക്കുന്ന ഈ പുരസ്കാരം നടൻ ജേക്കബ് കോളിൻസിന്റെ ചിത്രം വരച്ച സിയാൻ ലേയ് നേരത്തെ സ്വന്തമാക്കിയിരുന്നു.
സെൻട്രൽ ഡിസേർട്ട് മേഖലയിൽ നിന്നുള്ള ആഡ്രിയൻ ജംഗാല റോബർട്ട്സൺ ഒരേസമയം ആർച്ചീബാൾഡ്, വിൻ, സൽമാൻ എന്നീ മൂന്ന് വിഭാഗങ്ങളിലും ഫൈനലിസ്റ്റായി എന്ന അപൂർവ്വ നേട്ടത്തിന് അർഹനായി. തിരഞ്ഞെടുക്കപ്പെട്ട ചിത്രങ്ങളുടെ പ്രദർശനം ശനിയാഴ്ച മുതൽ ഓഗസ്റ്റ് 16 വരെ സിഡ്നിയിലെ ആർട്ട് ഗാലറിയിൽ പൊതുജനങ്ങൾക്കായി തുറന്നുകൊടുക്കും. അതിനുശേഷം ചിത്രങ്ങൾ വിക്ടോറിയ, ന്യൂ സൗത്ത് വെയ്ൽസ് എന്നിവിടങ്ങളിൽ പ്രദർശിപ്പിക്കും.
